काठमाडौं– चिकित्सा शिक्षा आयोगका उपाध्यक्षका लागि नाम सिफारिस गर्न गठित समितिले ३ जनालाई छनोट गरेको छ ।

समितिले प्रस्तुतीकरण र अन्तरवार्तामा सहभागी भएका ९ जनामध्येबाट ३ जनाको नाम छनोट गरी शिक्षा विज्ञान तथा प्रविधि मन्त्रालयलाई बुझाएको हो ।

सिफारिस समितिले एक नम्बरमा प्राध्यापक डाक्टर सुरेन्द्र शेरचन, दुई नम्बरमा प्राडा शम्भुकुमार पहारी र तीन नम्बरमा प्राडा श्रीकृष्ण गिरीको नामा सिफारिस गरेको हो ।

आयोगको उपाध्यक्ष पदका लागि ११ जनाले उमेद्वारी दिएकामा सिफारिस समितिले ९ जनालाई मात्रै अन्तर्वार्ता र प्रस्तुतीकरणका लागि छनोट गरेको थियो । उनीहरुको साउन २६ र २७ गते प्रस्तुतीकरण तथा अन्तर्वार्ता भएको थियो ।

यसअघि आयोगको उपाध्यक्षका लागि नाम सिफारिस गर्न गठित समितिले असार ९ गते प्रकाशित गरेको सूचनाका आधारमा दरखास्त दिएका ६ जनाको दरखास्त रद्द गरेको थियो । समितिले दोस्रोपटक आह्वान गरेको सूचनाको आधारमा दरखास्ती दिएका मध्ये प्राडा शेरचन, पहारी र गिरी छनोट भएका हुन् ।

सिफारिस समितिले छनोट गरेका ३ जनामध्येबाट एकजनालाई मन्त्रिपरिषद्ले आयोगको उपाध्यक्षका लागि नियुक्ती गर्नेछ ।