काठमाडौं– ऊर्जा, जलस्रोत तथा सिँचाइमन्त्री दीपक खड्काले कृषिप्रधान देशमा सिँचाइको अभाव हुन दिन नहुने बताएका छन् ।

सिँचाइ विभागले नवनियुक्त मन्त्री खड्काको स्वागतमा आज आयोजना गरेको ‘बधाई तथा सम्मान’ कार्यक्रममा मन्त्री खड्काले सिँचाइको उचित व्यवस्थापन गरेर कृषि उत्पादनमा जोड दिनुपर्ने धारणा व्यक्त गरे।

‘कृषि क्षेत्रमा कसरी उत्पादन बढाउन सकिन्छ, त्यसको सोच बनाउन जरुरी छ, सिँचाइ नपुगेका ठाउँमा सिँचाइ पुर्‍याउनुपर्छ’, उनले भने । मन्त्री खड्काले वर्षात्मा बाढी र पहिरोका कारण ठूलो क्षति हुने भएकाले त्यसको समाधानमा विभाग चनाखो हुनुपर्ने उल्लेख गरे ।

ऊर्जामन्त्री खड्काले बर्खाको पानीलाई सही सदुपयोग गर्न सके कृषि क्षेत्रमा सहयोग पुग्न सक्ने बताए। उनले कतिपय आयोजनाहरू लामो समयसम्म सम्पन्न नभएको भन्दै कार्यान्वयन हुने गरी आयोजनामा लगानी गर्नुपर्ने बताए ।

मन्त्रालयकी सचिव सरिता दवाडीले देशको आर्थिक विकासको मेरुदण्ड कृषि क्षेत्र भएकाले कृषिलाई अगाडि बढाउन सिँचाइलाई प्राथमिकता दिनुपर्ने बताइन्। उनले १५ लाख ५० हजार हेक्टर जमिनमा सिँचाइको पूर्वाधार विकास भए पनि १० लाख क्षेत्रफलमा पूर्वाधार विकास हुन बाँकी रहेको बताइन् ।

सिँचाइ विभागका महानिर्देशक सञ्जीव बरालले छ वटा राष्ट्रिय गौरवका आयोजनालाई सिँचाइ विभाग अगाडि बढाएको जानकारी दिए । उनले सिँचाइका योजनालाई समयमै  सम्पन्न गर्न सके नेपालको सिँचाइ क्षेत्रले फड्को मार्ने उल्लेख गरे । विभागले ‘डिप ट्युबेल’मार्फत तीन लाख १८ हजार हेक्टर जमिनमा सिँचाइको व्यवस्था गरेको उनले जानकारी दिए ।