काठमाडौं– मलेशियामा अवैधानिक रुपमा बस्दै आएका विदेशी श्रमिकमाथि तीब्र धरपकड शुरु गरेको छ । मलेसियाको मुख्य शहर क्वालालम्पुरका विभिन्न क्षेत्रमा मलेसिया प्रहरीले अवैध विदेशी कामदारको खोजतलाश गरेको हो ।

उक्त क्षेत्रमा २ सय ८ जनाको चेकजाँचका क्रममा १ सय ६ जनासँग वैधानिक रुपमा बसोबासको अनुमति नभएको पाइएको प्रहरीले जनाएको छ । प्रहरीले खोजतलाश जारी रहने जनाएको छ ।

अवैधानिक रुपमा बस्दै आएका १ सय ६ जना विदेशी श्रमिक एकै दिनमा प्रहरीले पक्राउ गरेको मलेसियाली सञ्चारमाध्यमले जनाएका छन् ।

मलेसियाली अनलाइन द सनका अनुसार ४३ जना म्यानमारका नागारिक, ५ जना नेपाली, ३२ जना बंगलादेश, १२ जना भारत, ९ जना ईण्डोनेशिया, २ जना नाइजेरिया, २ जना श्रीलंका तथा एक जना पाकिस्तानी पक्राउ परेका छन् ।

सामान्य जरिवाना तिराएर घर फर्काउने ‘गुड फर व्याक’ कार्यक्रमसँगै प्रहरीले धरपकड पनि तीब्र बनाएको छ । मलेशियाका विभिन्न शहरहरुमा अवैध विदेशी श्रमिकको खोजतलाशमा प्रहरीले सक्रियता देखाएको हो ।

मलेशिया सरकारले दिएको व्याक फर गुड कार्यक्रममार्फत ७ सय रिंगिट जरिवाना तिरेर स्वदेश फर्किने नेपाली कामदारको संख्य पछिल्लो समय भने उल्लेख्य रहेको मलेसियास्थित नेपाली राजदूतावासले जानकारी दिएको छ ।

दूतावासले व्याक फर गुड कार्यक्रममा सहभागी नेपाली श्रमिकको फर्म भरिदिने, अध्यागमन कार्यालय लैजाने तथा ल्याउने लगायतको व्यवस्था गरेको छ ।