काठमाडौं– नक्कली लाइसेन्स प्रकरणमा यातायाता व्यवस्था कार्यालय बुटवलका प्रमुख एवम् उपसचिव केशव अर्यालसहित १५ जनाविरुद्ध मुद्दा दायर भएको छ ।

अर्यालसहित १५ जनाविरुद्ध जिल्ला सरकारी वकिलको कार्यालय काठमाडौं लिखतसम्बन्धी कसुरमा मुद्दा दायर गरेको हो। उनीहरू सबैविरुद्धको मुद्दाको फाइल मंगलबार काठमाडौं जिल्ला अदालतमा पुगेको छ ।

अर्यालसहित यातायात व्यवस्था कार्यालय बुटवलका कम्युटर अपरेटर लक्ष्मण पाण्डे (करार), पदमराज आचार्य, सुवास पौडेल, यातायात व्यवस्था कार्यालय कावासोती, नवलपरासीका कम्युटर अधिकृत रामकृष्ण श्रेष्ठ र यातायात व्यवस्था कार्यालय कास्कीका कम्युटर अपरेटर विनोद भण्डारीलाई पनि यो मुद्दामा प्रतिवादी बनाइएको छ ।

उनीहरूले विभिन्न मितिमा यातायात व्यवस्था विभागको विद्युतीय प्रणालीमा सवारी चालक अनुमति पत्रसम्बन्धी कुनै प्रक्रिया सुरु नगरेको, लिखित तथा ट्रायल परीक्षामा सहभागी नभएका, ढड्डा तथा साविकको पुरानो डीएल प्रणालीमा अभिलेख नरहेकालाई पास गराएको आरोप पत्रमा लेखिएको छ ।

उनीहरूकै संलग्नतामा शक्तिबहादुर खत्री, हर्षबहादुर सिञ्जालीलगायतको विवरण इलेक्ट्रोनिक ड्राइभिङ लाइसेन्स प्रणालीमा प्रवृष्ठ नगरी नक्कली विवरण प्रणालीमा इन्ट्री गर्दा नवीकरण गर्न मिल्ने गरी मिति र विवरण इन्ट्री गरी बायोमेट्रिक गराई नक्कली सवारी चालक अनुमति पत्र दिएको आरोप पनि लागेको छ ।