काठमाडौं– कोरिया सरकारले रोजगार अनुमति प्रणाली (ईपीएस) मार्फत सन् २०२० जनवरीदेखि रोजगारीका लागि आउने विदेशी श्रमिकका हकमा अनिवार्य सीप भएका श्रमिकलाई प्रथामिकतामा राख्ने भएको छ ।

भाषामात्र पास भएर आएका विदेशी श्रमिकमा ‘डिप्रेसन’ र रोजगारदाता परिवर्तन गर्ने क्रम बढेपछि कोरियाले सीप भएका कामदारलाई आफ्नो रोजगारीका लागि भित्र्याउने लक्ष्य लिएको हो ।

भाषामात्र अध्ययन गरेर सामान्य सीप नभएका विदेशी श्रमिकले अब कोरिया रोजगारीमा जान तालिम लिनुपर्ने वैदेशिक रोजगार ईपीएस शाखाले जनाएको छ ।

कोरियाका रोजगारदाता कम्पनीले सम्बन्धित विषयमा अनुभव भएका श्रमिक प्रमाणपत्र, तालिम र शैक्षिक योग्यताका आधारमा लिन खोजिरहेको कोरियाको मानव संसाधन केन्द्र (एचआरडी) काठमाडौंकी निर्देशक पार्क सुङ हिलेले बताइन् । नेपालबाट रोजगारीका लागि कोरिया जान चाहे नेपाली कामदारले भाषाभन्दा सीपमा जोड दिनुपर्ने उनको भनाइ छ ।

कोरियन भाषा परीक्षा उत्तीर्ण गर्दैमा कोरियामा रोजगारका लागि जान पाउने ग्यारेन्टी नभएको र सीपमा पनि दक्ष हुनुपर्ने वैदेशिक रोजगार ईपीएस शाखाका निर्देशक कृष्ण खनालले जानकारी दिएका छन् ।

सन् २०२० को कोरियन भाषा परीक्षामा ९२ हजार ३ सय ५६ जना सहभागी भएका थिए। जसमा १२ हजार ९ जनाले भाषा परीक्षा उत्तीर्ण गरेका छन् । तीमध्ये ६ हजार ७ सय जनासम्म छनोट गरिने भएको छ । उत्पादन क्षेत्रमा ४ हजार ७ सय जना र कृषि तथा पशुपालनतर्फ २ हजार छनोट गर्ने योजना एचआरडीको रहेको छ ।

हाल कोरियामा ४४ हजारभन्दा धेरै नेपाली कामदार रोजगारीमा कार्यरत रहेको सरकारी तथ्यांक छ । भाषा परीक्षामार्फत करिब ६० हजार नेपाली रोजगारीका लागि कोरिया पुगेका छन् । जसमा ७ हजारभन्दा धेरै महिला पनि रोजगारीका लागि कोरिया पुगेको शाखाले जनाएको छ ।