काठमाडौं– बाल गायिकाका रूपमा चर्चा बटुलेकी कमला घिमिरेले ‘माइली’ बाट फिल्ममा डेब्यू गर्ने भएकी छन् । उनले निर्माण पक्षसँग सम्झौता गरिसकेकी छन् ।

निर्माण पक्षले कमलाको पोस्टरलुक पनि सार्वजनिक गरेको छ । पोस्टरमा कमलालाई मन्द मुस्कानमा देखाइएको छ । उनको पृष्ठभूमिमा एक महिलाले केही काम गरिरहेको देख्न सकिन्छ ।

उनले फिल्ममा अनुबन्धपछि संगीतमा जस्तै अभिनयमा पनि दर्शकबाट साथ पाउने अपेक्षा राखिन् । फिल्ममा अवसर पाउने कारण संगीत नै रहेको उनको बुझाइ छ ।

यसअघि नायिका करिश्मा मानन्धर र प्रियंका कार्की यो फिल्ममा अनुबन्ध भइसकेका छन् ।  रुना इन्टरटेन्ट्मेन्टको ब्यानरमा बन्ने यो फिल्मको निर्देशन बाबू साहेब बलामीको रहेनेछ ।

निर्देशक बलामीका अनुसार सत्य घटनामा आधारित हुने यो फिल्ममा महिलाले भोग्ने पीडा देखाइनेछ । उनले कथाबारे जानकारी दिँदै भने, ‘दलित महिलाको श्रीमान् नभएपछि समाजले ऊमाथि कस्तो दृष्टि लगाउँछ ? उसका स–साना नाबालक छोरी हुर्काउन कति कठिन हुन्छ ? यही समाज जातियताको आडमा कसरी प्रताडित गर्छ भन्ने कथा फिल्ममा देखाइनेछ।’

असार अन्तिमबाट छायांकनमा निस्कने योजनामा निर्माण पक्ष रहेको छ । असारको अन्तिमबाट छायांकन गरिने फिल्म मकवानपुरको वीरखर्ग, कुलेखानी, काठमाडौं र दुबईमा खिचिनेछ ।