काठमाडौं- राष्ट्रिय स्वतन्त्र पार्टीका सभापति रव लामिछानेले अहिले लोकतन्त्रलाई खतरा आयो भनेर चिन्ता लिनुपर्ने जरुरी नभएको बताएका छन् ।

नेकपा एकीकृत समाजवादीको आइतबार प्रज्ञा भवनमा सुरु दशौँ राष्ट्रिय महाधिवेशन उद्घाटन समारोहलाई सम्बोधन गर्दै उनले यसो भनेका हुन् ।

‘धेरै लामो समय यहाँहरूको लिन चाहन्न। पछि जन्मिएकोले धेरै ठूलो कुरो गर्नु हुँदैन। म बढी बोल्दिन । म बोलीले पीडित भएको हुनाले यसलाई घटाउँछु । एउटा कुरा चाहिँ मैले भनेँ, २००७ सालदेखि आजसम्म सधैँभरि लोकतन्त्रमा खतरा खतरा । आज पनि यो मञ्चमा त्यही कुरा गरिँदैछ’, उनले भने, ‘हामीले सबै चिज प्राप्त गरिसक्यौँ । अधिकारका रुपमा, संविधानका रुपमा, व्यवस्थाका रुपमा पाइसकेका छौँ ।’

उनले अहिले पनि नेताहरूले लोकतान्त्रिक गणतान्त्रिक संविधान खतरामा रहेको भनेकोमा उनले गुनासो गरे । ‘हामीले सबै कुरा प्राप्त गरिसक्दा पनि मुलुक बडो विषम परिस्थितिमा छ। लोकतन्त्रलाई खतरा छ भनिएको छ’, उनले भने, ‘गरिब किसानहरूले, मजदुरहरूले, काम गरेर खाने मान्छेहरुले खतरामा पारे कि अरु कसले अप्ठ्यारोमा पार्यो ?’, उनले भने, ‘आमजनता सधैँ नेतृत्वको प्राथमिकतामा पर्नु पर्छ। तर यहाँ त अलग अलग भयो । नेताहरूले लोकतान्त्र खतरा पारेकोमा चिता लिनु पर्दैन । जनताले लिन्छ्न ।’

सभापति लामिछानेले संविधान बदल्दा पनि, व्यवस्था बदल्दा पनि जनताले चाहे जस्तो उपलब्धि नपाएको बताए। ‘अझै पनि तल्लो तहको, पिँधको मान्छेले अधिकार प्राप्त गर्न सकेको छैन’, उनले भने, ‘हाम्रा राजनीतिक सहमतिले आमजनतालाई राहत दिनुपर्छ। राष्ट्रिय सहमति गर्न केमा गर्ने हो? रोजगारी सिर्जना गर्ने हो कि के मा ? कसले रोक्छ, त्यसो गर्न ? भाषामा जनताको चिन्ता छ । तर नेताहरूको मनमा जनताको चिन्ता छैन ।’