काठमाडौं – सन् २०२० फेब्रुअरी ९ मा हुने ९२ ‌औं अस्कर अवार्डमा सहभागी हुन नेपाली फिल्ममेकरलाई पनि आवेदन आह्वान गरिएको छ । अन्तर्राष्ट्रिय फिचर चलचित्र समिति नेपालले अस्करका लागि फिल्म बुझाउन आह्वान गरेको हो ।

अवार्डमा सहभागी हुन चाहने नेपाली फिल्म निर्माता तथा निर्देशकले आफ्नो फिल्म यही अगस्ट ३० अर्थात नेपाली मितिअनुसार यही भदौ १३ गते शुक्रबार दिउँसो २ बजेसम्म बुझाई सक्नुपर्ने छनोट समितिले जनाएको छ ।

प्रतिस्पर्धामा भाग लिन चाहने मेकरले वि.सं. २०७५ असोज १५ गतेदेखि २०७६ साल भदौ १३ गतेसम्म प्रदर्शनमा आएका फिल्म सहभागी गराउन सक्नेछन् ।

फिल्ममेकरले आफ्ना फिल्म अन्तर्राष्ट्रिय फिचर चलचित्र छनोट समिति (नेपाल), काठमाडौंमा बुझाउन वा इमेल गर्न सकिनेछ ।

दरखास्तका साथमा निम्न कागजात र तिनका सफ्ट कपीसमेत संलग्ग्न गर्नुपर्ने:

– निर्देशक, निर्माता, कलाकार आदिका साथै सबै प्राविधिकहरूको नामावली (क्रेडिट टाइटल्स् पर्दामा देखिने क्रममा)

– अंग्रेजी भाषामा लेखिएको फिल्मको संक्षिप्त सारांश

– निर्देशकको फिल्मोग्राफी

– फिल्म प्रदर्शन गराउँदा उक्त फिल्म सात दिनभन्दा बढी चलचित्रघरमा सार्वजनिक प्रदर्शन भएको प्रमाणित गर्ने समाचार तथा सञ्चार माध्यमहरूमा छापिएका विज्ञापनका कटिङहरू

– सम्बन्धित फिल्मका ३ देखि ५ वटा स्थिर फोटाहरू

– निर्देशकको फोटो

– फिल्म रिलिज हुँदाको पोस्टर

– फिल्मको डिजिटल कपी