काठमाडौं- कोशी प्रदेशमा पहिचानवादीहरूले फेरि आन्दोलन घोषणा गरेका छन् ।

प्रदेश नं. १ पुनः नामाङ्कन संयुक्त सङ्घर्ष समितिको आइतबार ताप्लेजुङको फुङलिङमा बसेको बैठकले फेरि आन्दोलनमा जाने निर्णय लिएको हो ।

प्रदेश नं १ पुनः नामाङ्कन संयुक्त संघर्ष समितिको समन्वयरत संस्था किरात याक्थुङ चुम्लुङ संघीय अध्यक्ष प्रेम येक्तेनको अध्यक्षतामा बसेको उक्त बैठकले  प्रदेश सरकार र सभाले आन्दोलनलाई ध्यान नदिएको निष्कर्ष निकाल्दै कोशी नाम खारेजी आन्दोलनलाई आगामी मंसिरदेखि सशक्त बनाउने निर्णय लिएको छ ।

बैठकले आगामी मंसिर २ गते आइतवार बिराटनगरमा जनप्रदर्शनसहित नयाँ चरणको आन्दोलन सुरु गर्ने निर्णय गरेको हो ।

त्यसैगरी कोशी नाम खारेज गरी पहिचानको आधारमा पुनः नामाङ्कन आन्दोलनलाई सम्बोधन गर्नेतर्फ सत्ताधारी दल र नेताहरू अग्रसर नदेखिएको जनाउँदै संघर्ष समितिको रणनीतिक योजनाअनुसार स्थानीय तहबाटै समानान्तर सत्ता अभ्यास थाल्न अध्ययन र तयारी गर्ने निर्णय पनि बैठकले गरेको छ ।

कोशी नाममा भोट दिने ८२ जना प्रदेश सांसद र आन्दोलनरत संस्था तथा नेतृत्वलाई साम्प्रदायिकको संज्ञा दिने ३ जना नेताहरूलाई दबाब दिन उनीहरूका परिवार तथा नातागोतालाई अनुरोध गर्ने निर्णय पनि बैठकमा गरिएको छ । ।

बैठकले प्रदेश सभा सदस्यहरूलाई सार्वजनिक कार्यक्रममा निमन्त्रणा नगर्न नगराउनु पनि कोशीका सबैलाई अपिल गर्ने निर्णय पिन लिएको छ ।

प्रदेश सरकारले गठन गरेको  राजनीतिक तथा शान्ति वार्ता टोली कोशी नामका प्रस्तावक राम राना मगरकै नेतृत्वमा बनाइनु खेदजनक रहेको पनि बैठकले निष्कर्ष निकालेको छ ।

बैठकले अस्तित्वमा रहेका दलका नेताहरूसहित मुख्यमन्त्रीको नेतृत्वमा मात्रै वार्ता गर्न सकिने निर्णय पनि गरेको छ ।

निर्णयहरू