काठमाडौँ– आर्थिक वर्ष सन् २०२३–२४ मा भारतमा ७० अर्ब ९० करोड डलर बराबरको प्रत्यक्ष वैदेशिक लगानी भित्रिएको छ । भारतीय सञ्चार माध्यमका अनुसार भारतमा गत वर्षको अक्टोबर महिनामा ६ अर्ब डलर प्रत्यक्ष वैदेशिक लगानी भित्रिएको छ । 

त्यसैगरी, यसै वर्षको जनवरी महिनामा ५ अर्ब ९० करोड बराबरको प्रत्यक्ष वैदेशिक लगानी भित्रिएको भारतीय आर्थिक अनलाइन इकोनोमिक टाइम्सले जनाएको छ । आर्थिक वर्ष २०२३-२४ मा निर्माणको क्षेत्रमा प्रत्यक्ष वैदेशिक लगानी दोब्बरले बढेको छ ।

सन् २००० अप्रिलदेखि २०२४ मार्चसम्म भारतमा ९ खर्ब ९० अर्ब प्रत्यक्ष लगानी भित्रिएको छ । यो अवधिमा भारतमा सबैभन्दा धेरै प्रत्यक्ष वैदेशिक लगानी मौरिससबाट भित्रिएको छ । मौरिससबाट प्रत्यक्ष वैदेशिक लगानीको २५ प्रतिशत भित्रिएको जनाइएको छ । त्यसपछि सिंगापुरबाट २४ प्रतिशत भित्रिएको छ । 

अमेरिकाबाट भारतमा १० प्रतिशत, नेदरल्याण्ड्सबाट ७ प्रतिशत र जापानबाट ६ प्रतिशत लगानी भित्रिएको छ ।

आर्थिक वर्ष २०२३–२४ मा भारतको महाराष्ट्र राज्यमा सबैभन्दा धेरै ३० प्रतिशत लगानी भित्रिएको छ । त्यसपछि कर्णाटक मा २२ प्रतिशत र गुजरातमा १७ प्रतिशत प्रत्यक्ष वैदेशिक लगानी भित्रिएको इकोनोमिक टाइम्सले उल्लेख गरेको छ ।