पोखरा- सहकारी पीडितहरूले प्रधानमन्त्री पुष्पकमल दाहाल ‘प्रचण्ड’लाई बुधबार पोखरामा कालो झण्डा देखाएका छन् ।

नेकपा माओवादी केन्द्र गण्डकीको कार्यकर्ता प्रशिक्षण भाग लिन पोखरामा रहेका प्रधानमन्त्री प्रचण्डलाई बुधबार सूर्यदर्शन सहकारीपीडितहरूले कालो झण्डा देखाएका हुन् ।

पोखरा सभागृहअगाडि प्रदर्शनमा उत्रिएका उनीहरूले प्रधानमन्त्रीलाई कालो झण्डा र ब्यानर देखाउँदै नाराबाजीसमेत गरे ।

प्रचण्डलाई कालो झण्डा देखाउने क्रममा प्रहरीले ११ जना प्रदर्शनकारीलाई नियन्त्रणमा लिएको छ । प्रदर्शनका क्रममा सभागृह क्षेत्र केहीबेर तनावग्रस्त भयो ।

प्रदर्शनका क्रममा दुईजना घाइते भएका छन् । उनीहरूलाई उपचारका लागि अस्पताल लगिएको  छ। घाइतेहरू ७८ वर्षीय भीमप्रसाद चपाईं र ३० वर्षीया अनुराधा श्रेष्ठ रहेका छन् ।

सूर्यदर्शन सहकारीपीडितहरूले पोखरामा प्रदर्शन गर्दै आएका छन् । यो सहकारीको बचत हिनामिनामा गृहमन्त्री रवि लामिछानेको संलग्नता रहेको दाबीसहित कांग्रेसले छानबिन माग गरिरहेको छ ।