काठमाडौं– बेरोजगार युवाहरूलाई वैदेशिक रोजगारीमा पठाउने भनी आकर्षक तलबको प्रलोभनमा पारी पीडितहरूबाट रकम लिए पश्चात् विदेश नपठाई सम्पर्क विहीन भएको आरोपमा तीन जना पक्राउ परेका छन् ।

पक्राउ पर्नेमा रुकुम पश्चिम घर भई सुकेधारा बस्ने ३९ वर्षीय रुपेश राज गिरी, स्याङ्जा घर भई बुढानीलकण्ठ बस्ने ४५ वर्षीय राजु ढकाल र  धनुषा घर भई तीनकुने बस्ने २२ वर्षीय युवराज ठाकुर रहेका छन् ।

रुपेश राज गिरीले देव सिंह महता समेतलाई रोमानिया पठाइदिन्छु भन्दै आठ लाख रुपैयाँ ठगी गरेको, राजु ढकालले अर्जुन सुनुवारलाई दुबई पठाइदिन्छु भन्दै दुई लाख पचास हजार रुपैयाँ ठगी गरेको र  युवराज ठाकुरले सशांक राज बानियाँ समेतलाई  पोल्यान्ड पठाइदिन्छु भन्दै ८ लाख रुपैयाँ ठगी गरेको आरोपमा काठमाडौं उपत्यका अपराध अनुसन्धान कार्यालयबाट खटिएको प्रहरी टोलीले सोमबार काठमाडौंबाट पक्राउ गरेको हो ।

उनीहरूलाई पक्राउ गरी थप अनुसन्धान तथा कारबाहीको लागी वैदेशिक रोजगार विभाग ताहाचल काठमाडौं पठाइएको प्रहरीले जनाएको छ ।