शियान- धुलिखेल नगरपालिकाका मेयर अशोक ब्यान्जु र चीनको शियान नगरपालिका भगिनी सम्बन्ध विभागका प्रमुख वाङ फेङबीच भेटवार्ता भएको छ ।

चीनको शान्सी प्रान्तको शियानमा भएको भेटमा धुलिखेल र शियान नगरपालिकाबीच भगिनी सम्बन्ध स्थापना गर्ने विषयमा छलफल भएको थियो ।
प्रमुख फेङले धुलिखेल र शियानबीच भगिनी सम्बन्ध स्थापना गर्न आफूहरु तयार रहेको बताए ।

उनले भने,’नेपाल र चीनबीचको सम्बन्धलाई थप प्रगाढ बनाउनका लागि शियान र धुलिखेलबीचको सम्बन्धलाई थप प्रगाढ बनाउन जरुरी छ र त्यसकालागि हरेक क्षत्रमा सहकार्य गरेर अघि बढ्न शियान तयार छ ।’

धुलिखेलका मेयर ब्यान्जुले नेपाल र चीनबीचको प्राचीन सम्बन्धलाई थप विस्तार गर्न जरुरी रहेको बताए । ‘नेपाल र चीनबीच भृकुटीको समयदेखि रहेको मित्रतालाई थप उचाइमा पुर्‍याउन जरुरी छ’, मेयर ब्यान्जुले भने, ‘त्यसका लागि शियान र धुलिखेलबीच पारस्पारिक हित, शिक्षा, पर्यटन, विकास निर्माण लगायतमा मिलेर काम गर्न जरुरी छ ।’

मेयर ब्यान्जुले शियानले छोटो समयमा गरेको विकाश र समृद्धिलाई धुलिखेल र नेपालका अन्य नगरपालिकाले अवलम्बन गर्दा फाईदा पुग्ने बताए । आफ्नो शियान भ्रमणले धुलिखेलको विकास र समृद्धिमा टेवा पुग्ने विश्वास मेयर ब्यान्जुको थियो । भेटमा प्रमुख फेङसहित शियान नगरपालिकाका अन्य पदाधिकारीको पनि उपस्थिती थियो । यस अघि सोमबार मेयर ब्यान्जु र शियान नगरपालिकाका मेयर लि मिनयुङवीच भेटवार्ता भएको थियो ।