काठमाडौं– राष्ट्रिय प्रजातन्त्र पार्टीका अध्यक्ष एवम् प्रतिनिधि सभा सदस्य राजेन्द्र लिङ्देनले अहिले संसद् खोल्ने विकल्पमा जानुपर्ने बताएका छन् ।

उनले संसद् खोल्नका लागि उपप्रधान तथा गृहमन्त्री रवि लामिछानेलाई बोल्न दिएर छानबिन समिति बनाउनुपर्ने विकल्प सुझाएका छन् ।

बिहीबार खबरहबसँग कुरा गर्दै लिङ्देनले भने, ‘अहिले गृहमन्त्रीलाई बोल्न दिएर समिति बनाउने र सदन सुचारु गर्नेतर्फ हाम्रो छलफल भएको छ ।’

लिङ्देनले गृहमन्त्री लामिछानेले राजीनामा दिने या पदमा बसिरहने भन्ने विषय अब विकसित हुने घटनाक्रमले देखाउने बताए ।

उनले भने, ‘अहिले समिति बनाउनेमा सत्ता पक्ष र प्रतिपक्षबीच साझेदारी बन्दै छ । राजीनामाको कुरा अलिक पछाडिको विषय भयो । गृहमन्त्रीज्यूले के गर्दा सहज हुन्छ, त्यही गर्नुहोला नि !’

बिहीबार बिहान बसेको पाँच दलका सचेतकहरूसँगको बैठकपछि प्रधानमन्त्री र दलहरूबीच गृहमन्त्रीले संसद्‍मा बोलेर समिति बनाउने कुरामा सहमति भएको छ ।