चीनका विदेश मन्त्री वाङ यीले अमेरिकी विदेश मन्त्री एन्टनी ब्लिङ्कनसँग सीमाभित्र रहे मात्रै सम्बन्धले उचाइ लिने बताएका छन् ।
बेइजिङमा ब्लिङ्कनसँगको संवादका क्रममा उनले चीनको मामिलामा अमेरिकाले सीमा ननाघ्नु नै उचित हुने भन्दै चेतावनीको भाषा प्रयोग गरेका हुन् ।
अमेरिकी विदेश मन्त्री ब्लिङ्कन २४ अप्रिलदेखि ३ दिने चीनको भ्रमणमा छन् । उनले शुक्रबार वाङ यीलाई बेइजिङमा भेटेर लामो वार्ता गरेका थिए ।
वाङ्ग यीले बैठकको सुरुवात गर्दै यस्ता प्रश्न गरेका थिए जसलाई जिज्ञासा भन्दा धेरै चेतावनीका रुपमा बुझ्न सकिन्थ्यो ।
‘के चीन र अमेरिकाको सम्बन्ध सही दिशामा अघि बढिरहेको छ ? या फेरि खस्किँदै तलतिर झरिरहेको छ ?’, उनले समकक्षी ब्लिङ्कनलाई सोधे ।
वाङ यीले चीन र अमेरिकाको सम्बन्धमा स्थिरता आएको बताउँदै तर अझै पनि त्यसमा कयौँ नकारात्मक कुराहरू रहेको उल्लेख गरे ।
अमेरिकी विदेश मन्त्री एन्टनी ब्लिङ्कन एक सालबीचमा दोस्रो पटक चीनको भ्रमणमा निस्किएका हुन् ।
ब्लिङ्कनले शुक्रबार नै बेइजिङमा चिनियाँ राष्ट्रपति सी चिनफिङसँग दुई देशबीचका विवादास्पद मुद्दाहरूमा कुरा गरेका छन् । त्यहाँ पनि ब्लिङ्कनलाई अमेरिकाले विवाद घटाउनुको साटो बढाउने कोसिस गरेको भनाइ चिनियाँ पक्षले राखेको थियो ।
तियानमेन स्क्वायरनजिकै ग्रेट हल अफ द पिपुलमा स्थानीय समय अनुसार शुक्रबार दिउँसो यी दुई नेताको वार्ता भएको हो ।
सीले यो वर्ष अमेरिका-चीन कूटनीतिक सम्बन्ध स्थापनाको ४५औं वार्षिकोत्सव भएको उल्लेख गर्दै दुई देशले ‘शत्रुताको सट्टा साझेदार हुनुपर्छ’ भने ।
बैठकपछि पत्रकारहरूसँग कुरा गर्दै ब्लिङ्कनले अमेरिकाले चीनको विकासलाई रोक्ने वा विश्वका दुई ठूला अर्थतन्त्रबीच तनाव ल्याउने उद्देश्य नबोकेको बताए ।
‘हामी चीनको अर्थतन्त्र बृद्धि होस् भन्ने चाहन्छौं,’ उनले भने, ‘तर चीनले कसरी बढ्छ भन्ने कुरा महत्वपूर्ण छ ।’
प्रतिक्रिया