काठमाडौं–प्रधानमन्त्री केपी शर्मा ओलीले नेपालीले चाहेको विकास र समृद्धिको चाहाना अब पूरा हुने बताएका छन् । ६९ औ प्रजातन्त्र दिवसको अवसरमा शुभकामना सन्देश दिँदै प्रधानमन्त्रीले दशकौंदेखि आम नेपालीले लिएको समृद्ध नेपाल निमाणको चाहानालाई पूरा गर्ने बिन्दुमा आफूहरु आइपुगेको बताए ।

जनचाहाना अनुसार नै वर्तमान सरकारले ‘समृद्ध नेपाल, सुखी नेपाली’को अभियान अघि बढाएको भन्दै यो लक्ष्यका साथ आर्थिक एवं सामाजिक रुपान्तरणका लागि सरकार केन्द्रित भएको बताए ।

‘निरङ्कुशतन्त्र र अधिनायकवादलाई परास्त गर्ने हामी अब गरीबी, बेरोजगारी, पछ्यौटेपन, विभेद र अविकाशका विरुद्ध केन्द्रित भएका छौँ’, सन्देशमा प्रधानमन्त्रीले उल्लेख गरेका छन्, ‘हामी आर्थिक विकास र सामाजिक न्यायसहितको परिपूर्ण लोकतन्त्रको दिशामा अग्रसर छौँ।’

प्रधानमन्त्री ओलीले प्रजातन्त्र प्राप्तिका लागि ज्यानको बलिदान गर्ने सबैमा श्रद्धाञ्जली व्यक्त गरेका छन् ।