काठमाडौं – गत वर्ष नै दशैँमा रिलिज हुने भनिएको फिल्म ‘रातो टीका निधारमा’ को रिलिज मिति तय गरिएको छ । निर्माण टिमले यो फिल्म दशैँको अवसर पारेर असोज १० गतेदेखि प्रदर्शनमा आउने जानकारी दियो ।

चलचित्र ‘छ माया छपक्कै’ र ‘रातो टीका निधारमा’ दुवै फिल्म दशैँमा रिलिज हुने निर्माण टिमले पूर्वघोषणा गरेकाले कुन फिल्म कहिले रिलिज हुने भन्नेमा दुवै फिल्म मौन थिए । केही दिनअघि ‘रातो टीका निधारमा’ को गीत रिलिज कार्यक्रममा पनि फिल्मको प्रदर्शन मिति घोषणा गरिएको थिएन ।

यता ‘छ माया छपक्कै’ टिमले त झन् ४ वटा मितिमध्ये एक मितिमा फिल्म रिलिज हुने बताएको थियो ।

‘रातो टीका निधारमा’ फिल्म दशैँ विशेष भएको निर्देशक अशोक शर्माले बताए । फिल्ममा साम्राज्ञी शाह र अंकित शर्माको शीर्ष भूमिका रहनेछ भने नीता ढुंगाना, बुद्धि तामाङ, रविन्द्र झा, शिवहरि पौडेल, खुस्बु खडका, लक्ष्मी गिरी, बसुन्धरा भुसाल, अरुणा कार्की, राजाराम पौडेल लगायतका कलाकारको अभिनय छ ।

रिलिजअघि चलचित्रको राम्रै चर्चा छ ।