काठमाडौं– नयाँ वर्षलाई लक्षित गरी ल्याइएको फिल्म ‘डिग्री माइला’का बारेमा दर्शकहरुसँग प्रत्यक्ष प्रतिक्रिया लिन प्रमुख कलाकारहरू मोफसलमा निस्किएको छ । कलाकारहरू दयाहाङ राई, आचल शर्मा, विजय बराल र कार्यकारी निर्माता मणिराम पोखरेलसहितको टिम मंगलबार पूर्वको यात्रामा निस्किएको हो ।

कोशी प्रदेशको राजधानी विराटनगरबाट सुरु हुने भेटघाट बिर्तामोड पुगेर टुङ्गिने मणिराम पोखरेलले जनाएका छन् । उनका अनुसार मंगलबार बिहान १० बजे विराटनगर स्थित क्यूएफएक्स सिनेमा हलमा पुगेर दर्शकसँग भेटघाट गर्ने कार्यक्रम तय भएको छ । त्यस्तै आजै विराटनगरका अन्य हलहरुमा समेत पुग्ने बताइएको छ।

विराटनगरपछि टिम इटहरी पुग्नेछ भने साँझ ५ बजे धरानका हलहरूमा पुग्ने निर्माण पक्षले जनाएको छ । यस्तै बुधबार झापाका विभिन्न हलहरूमा पुग्ने तालिका रहेको छ ।

रामबाबु गुरुङ निर्देशित फिल्मले सुदख व्यापार गरेको छ । वितरकका अनुसार दुई दिनमा ३ करोड ६ लाख कमाइ गरेको सिनेमाको कमाइ तेश्रो दिनमा झण्डै ४ करोडको निकट पुगेको छ ।

बाँसुरी फिल्मले कबड्डी फिल्मस् तथा सुस्मा फिल्मससँग मिलेर निर्माण गरेको यस फिल्मका निर्माताहरू विशाल गुरुङ, मणिराम पोखरेल, मधु मिजार तथा सुष्मा गुरुङ रहेका छन् । त्यस्तै, कार्यकारी निर्माता क्रिश लामा हुन् ।