काठमाडौं– प्रदीप भट्टराईको लेखन तथा निर्देशन रहेको फिल्म ‘महाजात्रा’ले अघिल्ला शृंखला ‘जात्रै जात्रा’को रेकर्ड तोडेको छ । ‘जात्रै जात्रा’ले सिड्नीमा बनाएको २७ शोको रेकर्ड महाजात्राले सोमबार तोडेको हो । 

डायस्पोरा वितरक कम्पनी एमएसएम इन्टरटेनमेन्टस्का अनुसार सोमबारसम्म महाजात्राले २८ पाएको छ । आउँदो शनिबारसम्म यसले अन्य फिल्मले बनाएका सिड्नी र अष्ट्रेलियाका सम्पूर्ण रेकर्ड तोड्ने वितरकको अनुमान छ । 

नेपाली फिल्मको लागि अष्ट्रेलियाको सिड्नी दोस्रो ठूलो बजार मानिन्छ ।  सुपरहिटको ट्याग पाउँदै यो फिल्म चौथो हप्तामा प्रदर्शनरत छ । 

सिड्नी प्रदर्शक रोटेपिङका प्रतिनिधि  रोशन भट्टराई भन्छन्, ‘महाजात्राले सिड्नीमा मात्र नभई अष्ट्रेलियामा अहिलेसम्म बनेको सबै रेकर्ड तोडेर नयाँ इतिहास बनाउनेमा हामी आशावादी छौं ।’

फिल्मका कार्यकारी निर्माता रवीन्द्रसिंह बानियाँले छिटै सम्पूर्ण देशको शो सङ्ख्या र व्यापारको विषयमा जानकारी गराउने बताएका छन् । 

‘जात्रा’ र ‘जात्रै जात्रा’ पछि षट्कोण आर्ट्सले निर्माण गरेको तेस्रो शृंखला ‘महाजात्रा’ ले तीन सातामा २३ करोड १ लाख ग्रस कलेक्सन गरेको छ । 

फिल्ममा हरिवंश आचार्य, वर्षा राउत, दिव्य देव, अर्जुनजंग शाही, प्रकाश घिमिरे, राजाराम पौडेल, प्रवीण खतिवडा, सुमन कार्की, शिशिर बाङ्देल, गौमाया गुरुङ, अरविन खड्का लगायतको अभिनय रहेको छ । 

फिल्ममा म्याक्स दीपेश खत्री र यज्ञेश्वर पौडेलले संयुक्त रुपमा निर्माण गरेका हुन् ।