काठमाडौं – चलचित्र ‘आमा’ निर्माण टिम छायांकनका लागि राजधानीको कोटेश्वरमा थियो । केही दृश्यका लागि आकाशबाट वास्तविक पानी पर्नुपर्ने थियो । दिनभरि कुर्दा पनि पानी नपर्दा छायांकन कार्य नै प्रभावित बनेको छ ।

बिहीबार त्रिभुवन विमानस्थलको रन वेमा पानी परे पनि कोटेश्वर चोकमा पानी नै परेन । पानी नपरेपछि छायांकन नै हुन नसकेको निर्माण टिमले जनायो ।

त्यसो त यसअघि पनि पानी नपर्दा फिल्मको छायांकन प्रभावित भएको थियो । समयसँगै बजेट लम्बिएको छ । तर काम हुन सकेको छैन ।
फिल्मका निर्देशक दीपेन्द्र के खनाल भन्छन्, ‘पानी पर्छ कि भनेर हामी राति २ बजेसम्म बस्यौँ, तर परेन ।’

निर्माण टिमका अनुसार यो फिल्मको आधाभन्दा बढी शूटिङ सकिएको छ । बाँकी रहेको ३५ प्रतिशत छायांकनका लागि झरी पर्नुपर्ने छ ।

असार १६ गतेबाट छायांकन शुरु भएको यो फिल्ममा मिथिला शर्मा र सुरक्षा पन्तले आमाछोरीको भूमिकामा अभिनय गरेका छन् । यो फिल्म फागुन ९ गतेदेखि प्रदर्शन हुने निर्माण टिमले जनाएको छ ।

फिल्मको छायांकनका लागि भने दैनिक २ लाख रुपैयाँ खर्च भइरहेको दीपेन्द्र के. खनालले बताए । क्लोज अप शट लिन त नक्कली पानी पार्न पनि सकिन्थ्यो तर वाइड शट लिँदा प्रभावकारी हुँदैन कि भनेर वास्तविक पानी परेका बेलामा छायांकन गर्न खोजिएको उनले बताए ।