इस्लामावाद– पाकिस्तानले आफ्नो मुलुकमा भारतीय चलचित्रको प्रदर्शनमा प्रतिबन्ध लगाएको छ ।

भारतले कश्मीरलाई विशेष राज्यको मान्यता दिने भारतीय संविधानको धारा खारेज गरेपछि पाकिस्तानले विरोधस्वरुप आफ्नो मुलुकमा भारतीय चलचित्रको प्रदर्शनमा प्रतिबन्ध लगाएको हो ।

पाकिस्तानी प्रधानमन्त्रीका सल्लाहकार फिर्दौस आशिक अवानले ट्विट गर्दै भारतीय सिनेमा, नाटक र अरु कुनै किसिमका भारतीय सामग्रीको प्रसारणमा प्रतिबन्ध लगाउने जनाएका हुन् ।

कश्मीर विवादका क्रममा पाकिस्तानले यसअघि भारतको कूटनीतिक दर्जा घटाउने र आफ्नो मुलुकमा रहेका भारतीय कूटनीतिज्ञलाई देशनिकाला गर्ने र भारतमा रहेका आफ्ना कूटनीतिज्ञलाई फिर्ता बोलाउने निर्णय गरिसकेको छ ।

त्यस्तै, पाकिस्तानले कश्मीरबारेको विषयलाई अन्तर्राष्ट्रिय मञ्चमा उठाउने निर्णय समेत गरेको छ ।

कश्मीरलाई भारत र पाकिस्तान दुबै मुलुकले आफ्नो सार्वभौमिकता दाबी गर्दै आएका छन् । पाकिस्तानमा भारतीय सिनेमा निकै लोकप्रिय मानिन्छन् ।