काठमाडौं – प्रदेश सरकार भागबन्डाका लागि आज बिहान प्रधानमन्त्रीको सरकारी निवास बालुवाटारमा बसेको सत्ता गठबन्धनका शीर्ष नेताहरूको बैठक बिनानिष्कर्ष टुङ्गियो ।

बैठकमा एकीकृत समाजवादीका अध्यक्ष माधवकुमार नेपालले आफूहरुलाई सत्ता प्राप्तिको भर्‍याङ मात्र बनाउन खोजेको भन्दै असन्तुष्टी पोखेका थिए ।

एमाले र माओवादी केन्द्रले सत्ता प्राप्तिको भर्‍याङ मात्र बनाउन खोजिएको भन्दै यथास्थितिमा सहयोग गर्न नसक्ने नेपालको अडानका कारण बैठक बिनानिष्कर्ष टुङ्गिएको हो ।

मुख्य गरेर नेपालले सात मध्य एक प्रदेशमा मुख्यमन्त्रीको माग गरेका छन् । राजनीतिक भागबन्डामा पनि सम्मानजनक सहभागी गराउनुपने उनको माग छ ।

मुख्यमन्त्री पाउने विषयमा लिखित सहमति खोजेसागै आजको बैठक अनिर्णित बनेको बताइएको छ । प्रधानमन्त्री पुष्ककमल दाहाल र एमालेका अध्यक्ष केपी ओलीले नेपालाई बागमती सरकारलाई विश्वासको मत दिन आग्रह गरेका थिए । तर, नेपाल आफ्ना माग पूरा नभए गठबन्धनलाई सहयोग नगर्ने अडानमा देखिएको बताइएको छ ।

गठबन्धनको बैठक मुख्य गरी भोलि विश्वासको मत लिने तयारी गरेका बागमतीका मुख्यमन्त्री शालिकराम जम्कट्टेलको विषयमा केन्द्रीत भएको थियो । तर समाजवादी यहीँ अवस्थामा विश्वासको मत दिन असमर्थ रहेको बताएपछि बागमतीसहित अन्य प्रदेश सरकार पनि प्रभावित हुने भएको छ ।