काठमाडौं– नायकहरु आर्यन सिग्देल, प्रदीप खड्का र पल शाहको मुख्य भूमिका रहेको फिल्म  ‘पुजार सार्की’को छायाङ्कन चलिरहेको छ । निर्माण पक्षले अभिनेता प्रदीप खड्काको जन्मदिनको अवसर पारेर आइतबार चलचित्रमा उनले निर्वाह गरेको पात्र सार्वजनिक गरेको छ ।

फिल्मका निर्देशक दिनेश राउतले प्रदीपले निर्वाह गरेको पात्रको नाम  ‘मैत बहादुर’ रहेको खुलासा गरेका हुन् । उनले सार्वजनिक गरेको दुई तस्वीरमा प्रदीप लामो कपाल, कालो टोपी लगाएर  ‘दमाहा’ बजाउँदै गरेको देख्न सकिन्छ । निर्देशक राउतले  ‘मैत बहादुर’को थर भने खुलाएका छ‍ैनन् ।

‘पुजार सार्की’ जातीय विभेदविरुद्ध समाजका तीन पात्रहरूले गर्ने साझा सङ्घर्षको कथामा आधारित चलचित्र रहेको निर्माण पक्षले जानकारी दिएको छ । कास्की जिल्लाको कास्कीकोमा फिल्मको छायाङ्कन भइरहेको छ ।

यस चलचित्रमा अभिनेत्री अन्जना बराइली र परीक्षा लिम्बुको प्रमुख भूमिका रहेको छ ।  किङ्गडम नेटवर्कको ब्यानरमा बन्ने यो फिल्मका लेखक विकास सुवेदी हुन् भने लगानी सुवास भुसालको रहेको छ ।