वीरगन्ज– पर्साको वीरगन्जमा गोली चलेको छ । घर नजिकको बाटोसम्बन्धी छिमेकीबीचको विवाद चलिरहेका बेला गोली चलेको जिल्ला प्रहरी कार्यालय पर्साले जनाएको छ ।

गोली चलाउने व्यक्तिसहित २ जनालाई प्रहरीले पक्राउ गरेको छ । पक्राउ पर्नेमा वीरगन्ज महानगरपालिका–२० श्रीपुरका २० वर्षीय कुन्दन साह र उनको बुवा मोहन साह छन् ।

जिल्ला प्रहरी कार्यालय पर्साका प्रमुख प्रहरी उपरीक्षक सोमेन्द्रसिंह राठोरका अनुसार वृजेशकुमार पटेल र मोहन साहबीच बाटो र पर्खाल बनाउने विषयमा विवाद हुँदा गोली चलेको हो ।

एसपी राठोरका अनुसार छिमेकीलाई डराउनका लागि २० वर्षीय कुन्दन साहले गोली चलाएका हुन् । उनले आफ्नो बुवाको अनुमति (लाइसेन्स) प्राप्त हतियार (बाह्रबोर बन्दुक)बाट गोली चलाएका एसपी राठोरले जानकारी दिए ।

‘बाटो सम्बन्धी विवादमा छिमेकीलाई डराउनका लागि कुन्दनले आफ्ना बुवाको बुन्दुक निकालेर हावामा फायर गरेको भन्ने जानकारी आएको छ,’ एसपी राठेरले खबरहबसँग भने, ‘अहिले गोली चलाउने कुन्दन र उनका बुवा मोहन साहलाई नियन्त्रणमा लिएका छौं । दुवै जनामाथि थप अनुसन्धान भइरहेको छ ।’