काठमाडौं– सुनको मूल्य अहिलेसम्मकै महंगो बनेको छ ।

आइतबार नेपाल सुन चाँदी व्यवसायी महासंघले प्रतितोला ६६ हजार ३ सय रुपैयाँ मूल्य तोकेको थियो । शुक्रवार नेपाली बजारमा सुन प्रतितोला ६५ हजार ५ सयमा कारोबार भएको थियो ।

विश्वबजारमा सुनको मूल्य बढेसँगै नेपाली बजारमा पनि बढेको महासंघले जनाएको छ ।

विश्व बजारमा सुनको मूल्य बढेर १ हजार ४ सय ४१ डलर प्रतिऔंस पुगेसँगै नेपाली बजारमा पनि सुन हालसम्मकै उच्च बनेको हो ।

सुनको मूल्य उच्च भएसँगै सुनको कारोबार ७५ प्रतिशतले घटेको व्यवसायीको भनाइ छ । सुनको व्यापार नभएपछि करिब पौने आठ सय किलो सुन बैंकमा जम्मा भएको छ ।

करिब १ महिनायता बैंकले सुन आयात रोकेको छ । यसअघि आयात भएको सुन बिक्री नभएपछि बैंकले गत असार २० गतेदेखि सुन आयात रोका हुन् । आइतबारसम्म करिब ८०० किलो सुन बैंकमा थुप्रिएको बैंकर्स संघले जनाएको छ ।

हाल वाणिज्य बैंकले मात्र सुन आयात गर्न पाउने कानुनी व्यवस्था छ । सोही व्यवस्थाअनुसार २२ वटा वाणिज्य बैंकहरूले पालोअनुसार दैनिक २० किलोका दरले सुन आयात गर्दै आएका छन् । यसको व्यवस्थापन बैंकर्स संघले गर्छ ।