काठमाडौं– ‘द पोइट आइडल’को निर्णायक छनोटको विषयमा उत्पन्न विवादका बारेमा नायिका केकी अधिकारीले मुख खोलेकी छन् । ‘केकी निर्णायकमा उपयुक्त छैनन्’ भनेर आएको प्रतिक्रियालाई सकारात्मकरुपले लिएको उनले प्रतिक्रिया दिएकी छन् ।

कार्यक्रमको औपचारिक घोषणा गर्न शुक्रबार नयाँ बानेश्वरमा आयोजित कार्यक्रममा केकीले आफूमाथि आएका फरक विचारलाई सम्मानका साथ ग्रहण गरेको धारणा राखिन् ।

उनले स्पष्ट पार्दै भनिन्, ‘हामी सबैको आ–आफ्नो विचार हुन्छ र विचार राख्न पाउनुपर्छ भन्छौं । आफूमाथि फरक विचार राख्दा प्रतिकार गर्ने, यो विचार म लिन तयार छैन भन्ने चरित्र देखाउन लायक हुन्छ जस्तो मलाई लाग्दैन । सायद अभियनको प्रतियोगितामा अन्य क्षेत्रको व्यक्ति आएर निर्णायक बनेको अवस्थामा हाम्रो पनि असन्तुष्टि हुन सक्थ्यो ।’

यो शोलाई लिएर आफूमाथि भएका टिप्पणी कार्यक्रम उत्कृष्ट बनाउने उद्देश्यले नै आएको उनको बुझाइ छ ।

उनी थप्छिन्, ‘कविता वा साहित्य क्षेत्रमा लामो समयदेखि योगदान दिनुभएको व्यक्तिहरु नै निर्णायक भएको भए यो कार्यक्रम झन् राम्रो हुने थियो भन्ने उहाँहरुको धारणा हो । जुन राम्रो हो ।’