इस्लामावाद- पाकिस्तानमा धार्मिक अल्पसङ्ख्यकविरुद्ध हुने दमनका घटना बढ्दै गएको पाइएको छ । पछिल्लो पटक पाकिस्तानको पञ्जाब प्रान्तको लाहोर सहरबाट १ सय किलोमिटरको दुरीमा पर्ने दस्का सहरमा अहमदिया साम्प्रदायिक अल्पसङ्ख्यकको चिहान भत्काइएको घटना सार्वजनिक भएको हो ।

दस्कामा रहेका दुई समाधिस्थलमा रहेका ८० भन्दा धेरै चिहान भत्काइएको अन्तर्राष्ट्रिय सञ्चार माध्यमले जनाएका छन् । सुन्नी उग्रवादीहरुको दबाबमा प्रहरीले नै चिहान भत्काएको बताइएको छ ।

यद्यपि अहमदियाहरुले भने भत्काइएको उक्त समाधिस्थलको हिस्सा आफ्नो समुदायका लागि छुट्याइएको जनाएका छन् । पाकिस्तानको संविधानले अहमदियाहरुलाई इस्लामिक चिह्न र पहिचानको प्रयोग गर्न दिँदैन ।

पछिल्ला केही वर्षयता अहमदियाहरु पाकिस्तानमा हिंसा र लज्जाको सिकार हुँदै आएको भारतीय समाचार संस्था एएनआईले जनाएको छ ।