माले- पछिल्लो समय राष्ट्रपति मोहम्मद मुइज्जुको नेतृत्वमा भारतसँगको सम्बन्ध बिग्रिँदै गएको भन्दै मालदिभ्सका दुई विपक्षी पार्टीले आपत्ति जनाएका छन् । मालदिभियन डेमोक्र्याटिक पार्टी (एमडीपी) र डेमोक्र्याट्सले संयुक्त विज्ञप्ति जारी गदै भारतसँगको सम्बन्ध बिग्रिए मुलुकको दीर्घकालीन विकासका लागि निकै ‘हानीकारक’ हुने उल्लेख गरेका छन् ।

विज्ञप्तिमा मालदिभ्सको विकासका लागि महत्वपूर्ण साझेदार, विशेषगरी लामो समयदेखिको साहयोगी मुलुकलाई पाखा लगाएर दीर्घकालनी विकास नहुने उल्लेख गरिएको भारतीय समाचार संस्था एएनआईले जनाएको छ ।

त्यसबाहेक हिन्द महासागरको स्थायित्व र सुरक्षा आफ्नो मुलुकको सुरक्षा र स्थायित्वका लागि अपरिहार्य रहेको विज्ञप्तिमा उल्लेख गरिएको छ ।

एमडीपी र डेमोक्र्याट्सले मालदिभ्स सरकारले रचनात्मक भएर स्थायित्व कायम गर्नुपर्ने र जनताको हितका लागि सबै विकासका साझेदारहरुसँग सहकार्य गर्नुपर्ने उल्लेख गरेका छन् ।