काठमाडौं– दिनेश दाहाल स्मृति पाँचौं अन्तर डोजाङ तेक्वान्दो प्रतियोगितामा नेप्लिज तेक्वान्दो एकेडेमी (एनटीए) च्याम्पियन बनेको छ । शनिबार सम्पन्न भएकाे प्रतियाेगितमा एनटीएले ८ स्वर्ण, ५ रजत र ३ कांस्य जित्दै ट्रफी उचालेको हो ।

डाँछीस्थित अल्पाइन एकेडेमीमा भएको प्रतियोगितामा ७ स्वर्ण, ५ रजत र १२ कांस्यसाथ अल्पाइन एकेडेमी दोस्रो भयो । त्यस्तै ६ स्वर्ण, १२ रजत र २२ कांस्य जितेको सनसाइन स्कुलले तेस्रो स्थान प्राप्त गर्यो । प्रतियोगितको आयोजना एनटीए र अल्पाइन एकेडेमीद्वारा संयुक्त गरेका थिए । विभिन्न ३० स्पर्धामा १ सय ४० खेलाडीले प्रतिस्पर्धा गरेका थिए ।

विजेतालाई कागेश्वरी मनोहरा नगरपालिकाका मेयर उपेन्द्र कार्की, तेक्वान्दोका अन्तर्राष्ट्रिय निर्णायक अशोक खड्का, तेक्वान्दो मुख्य प्रशिक्षक नवीनकुमार श्रेष्ठ, प्रतियोगिता संयोजक अल्पाइन एकेडेमीका प्रिन्सिपल अनन्तराम ढकाललगायतले पुरस्कार हस्तान्तरण गरेका थिए ।

त्यस्तै कार्यक्रममा १३ औं दक्षिण एसियाली खेलकुदका स्वर्ण जितेको तेक्वान्दोका वीरबहादुर महरालाई दिनेश दाहाल स्मृति खेलकुद प्रतिभा सम्मानसहित सम्मानित गरिएको थियो । त्यस्तै खेल पत्रकार प्रजित शाक्य र सीताराम कोइरालालाई प्रशंसापत्रसहित सम्मान गरिएको थियो ।