एजेन्सी – पश्चिम एसियाको इजरायल-लेबनान सीमा क्षेत्रबाट केही दिनभित्रै लाखौं सर्वसाधारण विस्थापित भएका छन्‌ । आफ्ना विरोधीहरूविरुद्ध लडाइँ छेडेको इजरायलले लेबनानमा सक्रिय लडाकु समूह हिज्बुल्लाहमाथि आक्रमण तीव्र पारेपछि दुबै देशका सीमा क्षेत्रमा बसोबास गरिरहेका लाखौं सर्वसाधारणले थातथलो छाडेका हुन्‌ ।

दुबै देशका सरकारले दुई देशको सीमा क्षेत्रमा युद्धका लडाइँका कारण प्रभावित मानिसहरूलाई सुरक्षित स्थानतर्फ जान भनेका थिए । लेबनानका स्वास्थ्यमन्र्त्री फिरास अबियादले इजरायलबाट भएका पछिल्ला हमलाका कारण हजारौं मानिस विस्थापित भएको बताएका छन्‌ ।

इजरायल-लेबनान सीमा क्षेत्रमा बसोबास गरिरहेका मानिसहरूले थातथलो छाडेको यो पहिलोपटक भने होइन । सन्‌ २०२३ अक्टोबर ७ देखि इजरायल-हमास संघर्ष शुरू भएदेखि नै सीमा क्षेत्रबाट लेबनानका मानिसहरू विस्थापित हुन थालेका थिए ।

त्यसयता हालसम्म दुई लाख लेबनानीहरू विस्थापित भइसकेका हुन्‌ । उत्तरी इजरायलतर्फ पनि करिब ६० हजार मानिस विस्थापित भएका छन्‌ ।

प्यालेस्टाइनको गाजापट्टीमा सक्रिय लडाकु समूह हमासविरुद्ध इजरायलले लडाइँ छेड्दादेखि नै लेबनानको लडाकु समूह हिज्बुल्लाह इजरायलविरुद्ध आक्रामक देखिँदै आएको छ । तर, गाजापट्टीमा हमासलाई लगभग तहसनहस पारेको इजरायलले पछिल्लोपटक लेबनानको हिज्बुल्लाहमाथि भीषण आक्रमण गरिरहेको छ ।