काठमाडौँ– प्रधानमन्त्री कप पुरुष राष्ट्रिय क्रिकेट प्रतियोगितामा आज तीन खेल हुँदैछन् ।

आज भैरहवाको सिद्धार्थनगर रङ्गशालामा बिहान ९ बजे लुम्बिनी प्रदेश र त्रिभुवन आर्मी, कीर्तिपुरस्थित टीयू क्रिकेट मैदानमा बिहान सवा ९ बजे कोशी र सुदूरपश्चिम प्रदेश तथा मूलपानी क्रिकेट मैदानमा मधेश प्रदेश र नेपाल पुलिस क्लबबीच प्रतिस्पर्धा हुनेछ ।

अहिलेसम्म प्रधानमन्त्री कपमा नेपाल पुलिस क्लब मात्र अपराजित रहेको छ । नेपाल पुलिस क्लब आफ्ना ४ खेलमा सबै खेल जितेर ८ अंकसहित शीर्षस्थानमा रहेको छ ।

त्यस्तै बागमती प्रदेशले आफ्ना ७ खेलबाट ८ अंक हासिल गर्दै दोस्रो र मधेश प्रदेश प्रदेश ६ खेलबाट ८ अंकसहित तेस्रो स्थानमा रहेको छ ।

त्यसैगरी त्रिभुवन आर्मी क्लब ५ खेलबाट ६ अंकसहित चौथो स्थानमा उक्लिएको छ भने सुदूरपश्चिम प्रदेश ४ खेलबाट ६ अंकसहित पाँचौं स्थानमा रहेको छ ।

त्यस्तै, कर्णाली प्रदेश ६ खेलमा ६ अंकसहित छैटौँ स्थानमा छ भने एपीएफ ५ खेलमा ४ अंकसहित सातौँ स्थानमा झरेको छ ।

त्यसैगरी गण्डकी प्रदेश ५ खेलबाट २ जितसहित ४ अंक हासिल गर्दै आठौँ स्थानमा छ भने लुम्बिनी प्रदेशले आफ्ना ३ खेलमा एक जित र २ हार बेहोरेर नवौँ स्थानमा छ । कोशी प्रदेश भने अहिलेसम्मका ७ वटै खेलमा पराजित हुँदै अंकविहीन छ ।