भोजपुर– उत्तरी क्षेत्रमा अवस्थित षडानन्द नगरपालिका र साल्पासिलिछो गाउँपालिकालाई लक्षित गरेर इलाका प्रशासन कार्यालय दिङ्लाबाट शिविरमार्फत नागरिकता वितरण भइरहेको छ ।

भौगोलिकरुपमा विकट मानिने भोजपुरको उत्तरी क्षेत्रमा अवस्थित साल्पासिलिछोका बासिन्दालाई नागरिकता प्राप्त गर्न निकै कठिन छ । यहाँका नागरिकलाई नागरिकता लिन धेरै समय र खर्च लाग्ने गरेको छ । भौगोलिक विकटताका कारण कतिपय स्थानीय लामो समयसम्म नागरिकतासमेत नबनाइ बस्ने गरेका छन् ।  

नागरिकले पाएको सास्तीलाई ध्यानमा राखेर यहाँका स्थानीयलाई घुम्ती शिविर सञ्चालन गरेर नागरिकता प्रदान गरिएको छ । साल्पासिलिछो गाउँपालिका र इलाका प्रशासन कार्यालय दिङ्लाको समन्वयमा यहाँ शिविर सञ्चालन गरेर नागरिकता वितरण गरिएको हो । 

शिविरबाट घर पायकामा नागरिकता लिन पाउँदा सहजता भएको वडा नं ५ च्याक्सिलाका बासिन्दा मिङ्मा शेर्पाले बताए। भौगोलिक विकटताका कारण नागरिकता बनाउन समस्या भएको अवस्थामा गाउँमा सेवा पाउँदा खुसी लागेको उनको भनाइ छ ।

माघको दोस्रो हप्तासम्म सञ्चालन हुने गरी सुरुआत गरिएको शिविरबाट बिहीबार यहाँका दुर्गम मानिने वडा नं ५ र ६ का दुई सय ५८ जनालाई नागरिकता वितरण गरिएको गाउँपालिकाका प्रमुख प्रशासकीय अधिकृत माधवकुमार अधिकारीले जानकारी दिए । 

यहाँका नागरिकता प्राप्त गर्न बाँकी रहेका तथा प्रतिलिपि लिनुपर्ने मानिसको तथ्यांक संकलन गरेर वितरणको कार्य शुभारम्भ गरिएको उनको भनाइ छ । गाउँपालिकाका छवटै वडाका नागरिकलाई शिविरमार्फत नागरिकता वितरण गर्ने कार्यक्रम रहेको उनले जानकारी दिए ।

‘भौगोलिक विकटताका कारण यहाँका नागरिकलाई सेवा लिन निकै समस्या छ’, प्रशासकीय अधिकृत अधिकारीले भने, ‘नागरिकता बनाउनका लागि धेरै समय र खर्च लाग्ने अवस्था छ, नागरिकलाई सहज सेवा प्रवाह गर्ने लक्ष्यले इलाका प्रशासन कार्यालयसँगको सहकार्यमा घुम्ती शिविरबाट सेवा प्रवाह गरिरहेका छौँ ।’

गाउँपालिकाका ग्रामीण क्षेत्रका नागरिकलाई सहज र सरल किसिमले सेवा दिने उद्देश्यले घुम्ती शिविरको आयोजना गरेर सेवा प्रवाह गरिएको गाउँपालिका अध्यक्ष दौलथ कुलुङले बताए । गाउँपालिकाको पहलमा सञ्चालन गरिएको शिविरले नागरिकलाई सहजता थपिएको अध्यक्ष कुलुङको भनाइ छ । घर पायकमा सेवा प्रवाह गरिएकाले नागरिकको समय र पैसाको बचत भएको उनले बताए।

इलाका प्रशासन कार्यालय दिङ्लाका प्रमुख विनोद अधिकारीसहितको समूहले शिविरमार्फत स्थानीयलाई नागरिकता वितरण गरेको छ । शिविरमार्फत सेवा प्रवाह गर्न गाउँपालिकासँगको सहकार्यमा इलाका प्रशासन कार्यालयले गत पुस २५ गतेदेखि विवरण संकलन गरेको थियो । 

त्यही विवरणका आधारमा नयाँ नागरिकतासँगै प्रतिलिपि वितरण गरिएको हो । राष्ट्रिय जनगणना २०७८ अनुसार सो गाउँपालिकाको कूल जनसङ्ख्या १२ हजार दुई सय ८४ रहेको छ । यहाँ दुई हजार नौ सय ९८ घरधुरीको बसोबास छ ।