काठमाडौँ– इंग्लिस प्रिमियर लिग फुटबलमा म्यानचेस्टर युनाइटेड र टोटनहमले बराबरी खेलेका छन् । गएराती सम्पन्न खेलमा म्यानचेस्टर युनाइटेड र टोटनहमले २–२ गोलको बराबरी खेल्दै अंक बाँडेका छन् ।

म्यानचेस्टर युनाइटेडले खेलमा दुई पटक अग्रता बनाए पनि सो अग्रता जोगाउन नसक्दा अंक बाँड्नु परेको थियो ।

खेलको तेस्रो मिनेटमा नै रासमस होजलण्डको गोलमा अग्रता लिएको म्यानचेस्टर युनाइटेडले खेलको १९औँ मिनेटमा गोल खाएको थियो । टोटनहमका लागि रिचार्लिशनले बराबरी गोल गरेका थिए ।

त्यसपछि खेलको ४०औँ मिनेटमा मार्कश राशफोर्डले गोल गर्दै म्यानचेस्टर युनाइटेडलाई पुनः अग्रता दिलाएका थिए । तर दोस्रो हाफको पहिलो मिनेटमा नै टोटनहमका रोड्रीगो बेन्टानकरले गोल गर्दै खेललाई बराबरीमा ल्याएका थिए ।

यो बराबरीपछि टोटनहम २१ खेलबाट ४० अंक जोडेर लिगमा पाँचौं स्थानमा रहेको छ । त्यस्तै म्यानचेस्टर युनाइटेड ३२ अंकसहित सातौँ स्थानमा छ ।