काठमाडौँ– नेपाल क्रिकेट संघ (क्यान) ले आयोजना गरेको प्रधानमन्त्री कप पुरुष राष्ट्रिय क्रिकेट प्रतियोगिता (पीएम कप) आजदेखि सुरु हुँदैछ ।

माघ २० गतेसम्म संचालन हुने प्रतियोगितामा सात प्रदेश र तीन विभागीय टोली नेपाल पुलिस क्लब, एपीएफ र नेपाल आर्मी सहभागी छन् ।

हरेक टोलीले एक–अर्काविरुद्ध एक–एक पटक खेलेपछि शीर्ष दुईमा पुग्ने टोलीले फाइनल खेल्ने छन् । यस पटक पीएम कप प्रतियोगिता पहिलो पटक काठमाडौँ बाहिर भैरहवामा पनि सञ्चालन हुँदैछ ।

एकदिवसीय फर्म्याटमा हुने पीएम कपको पहिलो दिन तीन खेल हुने तालिका रहेको छ । जसमा कीर्तिपुरस्थित टीयू क्रिकेट मैदानमा बागमती प्रदेशले नेपाल पुलिसको सामना गर्ने छ भने मूलपानी क्रिकेट मैदानमा कोशी प्रदेशले मधेश प्रदेशको सामना गर्ने छ ।

यस्तै, भैरहवा क्रिकेट मैदानमा लुम्बिनी प्रदेश र गण्डकी प्रदेशबीच प्रतिस्पर्धा हुनेछ ।