काठमाडौं – प्रधानमन्त्री निवास बालुवाटारमा शनिबार राती सम्पन्न सत्ता गठबन्धनको बैठक निष्कर्षविहिन भएको छ । राष्ट्रियसभा निर्वाचनको सीट बाँडफाँडमा कुरा नमिलेपछि बैठक बिना निष्कर्ष सकिएको हो ।

बैठकमा सहभागी कांग्रेस प्रमुख सचेतक रमेश लेखकका अनुसार बैठक सकारात्मक भए पनि अन्तिम टुंगोमा पुग्ने सकेन । आइतबार बिहान बस्ने अर्को बैठकले सीट बाँडफाँड टुङ्गो लगाउने उनले जानकारी दिए । ‘आजको बैठकमा धेरै कुरा मिलिसकेको छ । केही कुरामा सहमति हुन बाँकी छ । भोलि बस्ने बैठकमा सबै कुरो टुंगो लाग्ने छ ’ लेखकले भने ।

गठबन्धनमा आबद्ध दलहरुले राष्ट्रिय सभामा रिक्त सिटभन्दा बढी दाबी गरेपछि कुरा मिल्न नसकेको हो । स्रोत अनुसार राष्ट्रिय जनमोर्चाले पनि १ सिटमा दाबी गरेको छ । कांग्रेसले ११ सिटमा आफ्नो दाबी कायमै राखेको छ । दुई सिट पाउने लगभग पक्का भएपनि जसपाले तीन सिटमा दाबी गरेको छ ।

नागरिक उन्मुक्ति, जनमत र जनमोर्चालाई १–१ सिट दिन गठबन्धनको सबैभन्दा ठूलो दल कांग्रेस तयार देखिएको छैन ।

बैठकमा नेपाली कांग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी पार्टी (जसपा) नेपाल, जनमत पार्टी, नागरिक उन्मुक्ति पार्टी, राष्ट्रिय जनमोर्चालगायत गठबन्धनमा आबद्ध दलका नेताहरुको सहभागिता थियो ।

आगामी माघ ११ गते हुने राष्ट्रियसभा सदस्य निर्वाचनका लागि यही पुस २३ गते सोमबार उम्मेदवारी मनोनयनको समय तोकिएको छ ।

राष्ट्रियसभामा आगामी फागुन २१ गतेबाट अध्यक्षसहित २० सांसदको कार्यकाल सकिँदै छ । जसमा एकजना मन्त्रिपरिषदको सिफारिसमा राष्ट्रपतिले मनोनीत गर्नेछन् भने १९ जना मतदानबाट चुनिने छन् ।

यो पनि…

राष्ट्रियसभा निर्वाचनबारे राप्रपाले सत्ता गठबन्धनसँग छलफल गर्ने

राष्ट्रियसभा निर्वाचन : कसरी हुन्छ सिटको पँजनी ?