काठमाडौं – प्रहरीले देशका विभिन्न स्थानबाट अवैध लागूऔषधसहित तीन जनालाई पक्राउ गरेको छ।

मकवानपुरको हेटौंडा उपमहानगरपालिका–१५ रातोमाटेबाट अवैध लागूऔषध गाँजा करीब १५ किलोग्रामसहित बाराको जितपुर सिमरा उपमहानगरपालिका–२३ बस्ने ३० वर्षीय रियाज देवानलाई शनिबार राति प्रहरीले पक्राउ गरेको हो।

बीआर १ पीबी ३३१४ नम्बरको भारतीय सुमोलाई प्रहरीले जाँच गर्न क्रममा सुमोमा लुकाई ल्याएको गाँजासहित चालक रियाजलाई पक्राउ गरेको छ।

कञ्चनपुरको बेलौरी नगरपालिका–६ गणेशपुर बस्ने ३८ वर्षीय दिनेश रानालाई अवैध लागूऔषध खैरो हेरोइन २ ग्राम ७३ मिलिग्रामसहित शनिबार राति प्रहरीले पक्राउ गरेको छ।

सुदूरपश्चिम प्रदेश प्रहरी कार्यालय धनगढी, लागूऔषध नियन्त्रण ब्यूरो शाखा कार्यालय महेन्द्रनगर समेतबाट खटिएको प्रहरीले उनको घरमा तलासी गर्दा लागूपदार्थसहित फेला पारी उनलाई पक्राउ गरेको छ।

रसुवाको गोसाईकुण्ड गाउँपालिका–५ स्याफ्रूवेशी सडक खण्डबाट अवैध लागूऔषध चरेश १२ ग्रामसहित गोसाईकुण्ड गाउँपालिका–१ थुमन बस्ने २३ वर्षीय सिंगबहादुर तामाङलाई आइतबार बिहान प्रहरीले पक्राउ गरेको छ।

प्रहरी चौकी स्याफ्रुबेशीबाट खटिएको प्रहरीले प्र ३–०२ ००२ प ५२३७ नम्बरको मोटरसाइकललाई जाँच गर्ने क्रममा लागूपदार्थसहित फेला पारी मोटरसाइकल चालक सिंगबहादुरलाई पक्राउ गरेको हो।

बरामद लागूऔषध सम्बन्धमा आवश्यक अनुसन्धान गरिरहेको प्रहरीले जनाएको छ।