काठमाडौं– अहिले बलिउडमा ‘स्टार किड’ को चर्चा छ भन्दा पनि फरक पर्दैन । अहिले सलमान खान, ऋतिक रोशन, रणवीर कपुर, आलिया भट्ट, अनन्या पाण्डेयालगायतको वरिपरी बलिउड घुमेको छ ।

सन् २०२३ को कुरा गर्ने हो भने शाहरुख खानकी छोरी सुहानालगायत तीन स्टार किडले फिल्म ‘अर्चिज’ बाट डेब्यू गरे । यस फिल्मबाट डेब्यू गर्ने अर्का दुई स्टार किड हुन्– अमिताभ बच्चनका नाति अगस्तय नंदा र नायिका श्रीदेवीको छोरी खुशी कपुर ।

अभिनयमा दख्खल नभए पनि स्टार किडहरुले फिल्मका अफर पाइरहेका हुन्छन् । कोही कलाकारितामै स्थापित हुन्छन् भने केही आएको थाहा हुन्छ फिल्मबाट टाढिएको वास्तै हुँदैन । रणवीर, आलिया, ऋतिक भने आफूलाई कलाकारका रुपमा प्रमाणित गरिसकेका स्टार किड हुन् ।

यद्यपि स्टार किडका लागि बलिउडमा डेब्यू चुट्कीको कुरा जस्तै देखिन्छ । उनीहरुले बलिउडलाई नै भविष्य बनाउने भन्ने कुराचाहिँ अभिनय क्षमताले नै निर्धारण भएको पाइन्छ ।

स्टार किडको सफल डेब्यू

ऋतिक रोशनका बुबा राकेश फिल्म निर्माता र निर्देशक हुन् । ऋतिकले आफ्नै बुबाको निर्देशन रहेको फिल्म ‘कहो ना… प्यार है’बाट सन् २००० मा बलिउडमा डेब्यू गरेका हुन् ।

भारतीय सञ्चार माध्ययम एनडीटीभीका अनुसार ऋतिकको यो फिल्मले सबैभन्दा बढी ९२ वटा अवार्ड जितेर सन् २००२ मा विश्व रकर्डसमेत बनाएको थियो ।

ऋतिकको यो डेब्यू फिल्म त्यस वर्षको सबैभन्दा बढी व्यापार गर्ने फिल्म थियो । दर्शकबाट पनि फिल्मले राम्रो प्रतिक्रिया पाएको थियो । सोही कारण ऋतिकको डेब्यूलाई बलिउडमा सबैभन्दा सफल मानिन्छ ।

यही फिल्मबाट ऋतिकको दर्शकको मन मात्रै जितेनन् उनले ‘बेस्ट डेब्यू’ र ‘बेस्ट एक्टर’को अवार्ड समेत जिते ।

ऋतिकको यो फिल्मले अमिर खान अभिनित २००१ मा सुपरहिट फिल्म ‘लगान’ को भन्दा ४३ वटा बढी अवार्ड जितेको थियो ।