काठमाडौँ– इंग्लिस प्रिमियर लिग फुटबलमा म्यानचेस्टर युनाइटेडले एस्टन भिल्लामाथि रोमाञ्चक जित हासिल गरेको छ। गएराति सम्पन्न खेलमा एस्टन भिल्लालाई ३–२ गोलले हराउँदै म्यानचेस्टर युनाइटेड विजयी भएको हो ।

खेलको पहिलो हाफमा २–० गोलले पछि परेको म्यानचेस्टरले दोस्रो हाफमा ३ गोल गरेको थियो ।

खेलमा पहिलो हाफको २१औँ मिनेटमामा भिल्लाका जोन म्याकगीनले गोल गर्दै टोलीलाई सुरुवाती अग्रता दिलाएका थिए । त्यसपछि २६औँ मिनेटमा भिल्लाकै लीन्डर डेनडोंकरले एक गोल थप्दै टोलीको अग्रतालाई दोब्बर बनाएका थिए ।

दोस्रा हाफको ५९औँ र ७१औँ मिनेटमा म्यानचेस्टरका अलेजान्द्रो गार्नाचोले गोल गर्दै खेललाई २–२ गोलको बराबरीमा ल्याए । त्यसपछि ८२औँ मिनेटमा रासमस होजलण्डले निर्णायक गोल गर्दै टोलीलाई ३–२ गोलको जित दिलाए ।

यो जितसँगै १९ खेलबाट ३१ अंक बनाएको म्यानचेस्टर युनाइटेड तालिकाको छैटौँ स्थानमा उक्लिएको छ । पराजित भएको एस्टन भिल्ला ३९ अंकसहित तेस्रो स्थानमा छ ।