मान्छेले अति गरेको सहन्छ, चार गरेको सहँदैन । आज अतिचार गर्नेहरुको संख्या बढिरहेको छ । देश भ्रष्टाचारको दलदलमा फसिरहेको छ । यसको जालो तलदेखि माथिसम्म फैलिरहेको छ ।

अहिले भुइँमान्छेहरुको रगत र पसिना राजनीतिज्ञदेखि जागिरेसम्मले लिइरहेका छन् । छि ! यस्तो प्रवृत्ति विरुद्ध बोल्नेहरुलाई भित्रभित्रै अनेक षड्यन्त्र गरेर ज्यान लिइरहेका छन् ।

भ्रष्टाचारले देशलाई चुर्लम्म डुबाइसकेको छ । डुबाउनेहरुलाई लाग्दो हो– हामीले जिन्दगी शानदार बनायौं । तर, भुइँमान्छेको रगत र आँशु चुसेर यिनलाई के शान्ति होला र ? भ्रष्टाचारीहरुको कुनै धर्म हुन्छ ? जात, सम्बन्ध, पार्टीहरु कुन–कुन हुन्छ ?

म त भ्रष्टाचारीलाई भ्रष्टाचारी नै देख्छु । अरुले अर्कै अवतारमा देख्छन् र एउटा समस्या जन्मिएको छ ।

यी जस्तासुकै मान्छे हुन्, यिनको पहुँच जस्तोसुकै ठूलो होस्, च्याप्प समातेर जेल हाल्न कसले, केले रोकिरहेको छ ?

भ्रष्टाचारीलाई समातिनबाटै बचाउने खेल अनेक मान्छेहरुले खेलिरहेका छन् । यिनको पनि छानविन हुन आवश्यक छ ।

यहाँ कानुनभन्दा माथि कोही मान्छे छैन । माथि छु भनिए पनि कानुनको बलात्कार गरेर आफू माथि बुर्कुशी मारिरहेका छन् धुन्धुकारीहरु । यिनलाई भुइँमान्छेबारे के चासो ?