काठमाडौँ– दोस्रो संस्करणको नेपाल सुपर लिग (एनएसएल) फुटबलमा आज लिग चरणका अन्तिम दुई खेल हुँदैछन् । आज बुटवल लुम्बिनी एफसी र वीरगञ्ज युनाइटेड तथा ललितपुर सिटी र काठमाडौँ रेजर्सबीच प्रतिस्पर्धा हुनेछ ।

आज दिउँसो १ बजे त्रिपुरेश्वरस्थित दशरथ रङ्गशालामा हुने पहिलो खेलमा बुटवल र वीरगन्ज भिड्ने छन् । यस्तै, साँझ ५ भने सुरु हुने दोस्रो खेलमा ललितपुर र काठमाडौँबीच प्रतिस्पर्धा हुने छ ।

आज वीरगन्जले जित निकालेमा १० अङ्कमा रहेको झापा एफसीलाई उछिन्दै शीर्ष चारमा आफ्नो स्थान पक्का गर्ने छ । यस्तै, ललितपुर र काठमाडौँ बीचको खेलको विजेताले पनि प्लेअफमा आफ्नो स्थान सुरक्षित गर्ने छ ।

ललितपुरले जित हासिल गरेमा दोस्रो स्थानमा रहेको धनगढी भन्दा अगाडि रहँदै शीर्ष दुईमा रहँदै प्लेअफमा खेल्ने छ भने काठमाडौँले जित निकाले तेस्रो स्थानमा रहेर लिग चरण टुंग्याउने छ ।

यता, हिजो भएको लिग चरणको आफ्नो अन्तिम खेलमा चितवन एफसीसँग पराजित भएपछि झापाको प्लेअफ सम्भावना कमजोर बनेको छ । आज बुटवल र ललितपुर दुवै टिमले जित निकालेको खण्डमा मात्र झापाको प्लेअफको यात्रा पक्का हुनेछ ।