काठमाडौं- नेकपा माओवादी केन्द्रका स्थायी समिति सदस्य खगराज भट्टले आफ्नो पार्टीले नेतृत्व गरेको सरकारको एक वर्ष सफल भएको बताएका छन् ।

मंगलबार संवाद डबलीले आयोजना गरेको कार्यक्रममा बोल्दै भट्टले पार्टी अध्यक्ष पुष्पकमल दाहाल ‘प्रचण्ड’ नेतृत्वको सरकार पछिल्ला सरकारभन्दा सुशासनको पक्षमा र भ्रष्टाचारविरुद्ध सफल भएको दाबी गरे ।

“नेपाल श्रीलंकाको बाटोतिर भन्ने हल्लाबीच हाम्रो पार्टीको नेतृत्वमा सरकार बनेको थियो । राजनीतिक र कूटनीतिक सन्तुलन मिलाएर सुशासन र भ्रष्टाचारविरुद्धको अभियान सञ्चालन गरेर सरकारले नयाँ रेकर्ड कायम गर्न सफल भएको छ” भट्टले भने । आर्थिक सूचकहरु सुधारोन्मुख रहेको भन्दै उनले निरासाबाट आशाका किरण देखा परेको बताए ।

सरकार दिर्घकालीन आर्थिक समृद्धिको लागि अगाडि बढेको बताउँदै भट्टले भने, “सरकार सामाजिक न्यायका हिसाबले पनि सफल भएको छ । निरङ्कुशकालीन मिटरब्याजीबाट नागरिक मुक्तभएका छन्, अर्ब पीडितले फिर्ता पाएका छन् । सरकारले विगतको तुलनामाभन्दा महङ्गी नियन्त्रणमा गर्न पनि सरकारले पहललिएको छ । विगतदेखि रोकिएको उखु किसानको बाँकी भुक्तानी भएको छ ।”