काठमाडौँ– त्रिभुवन विश्वविद्यालय (त्रिवि)ले आज ४९औँ दीक्षान्त समारोह गर्दै छ । दशरथ रङ्गशालामा बिहान ११ बजे समारोह सुरु हुनेछ । कार्यक्रममा राष्ट्रपति रामचन्द्र पौडेल प्रमुख अतिथि को रुपमा रहेका छन् ।

२०७९ साल असारदेखि २०८० को असार मसान्तसम्म पास भएका ७३ हजार विद्यार्थीमध्ये १२ हजार ४१५ जना विद्यार्थी दीक्षित हुन लागेका छन् ।

स्नातक तहतर्फ आठ हजार ९८ जना, स्नातकोत्तर तहतर्फ चार हजार एक सय चार, एमफिलतर्फ ४४ तथा विद्यावारिधीतर्फ एक सय १२ विद्यार्थी आज दीक्षित हुने बताइएको छ । गत वर्ष १० हजार तीन सय विद्यार्थी दीक्षान्त समारोहमा सहभागी भएका थिए ।

यस वर्ष एमफील, स्नातकोत्तर तह र स्नातक तह गरी २६ जना विद्यार्थीलाई विभिन्न विभूषणबाट विभूषित गरिँदैछ । उनीहरूलाई राष्ट्रपति पौडेलले प्रमाणपत्र तथा सम्मान पत्र प्रदान गर्ने कार्यक्रम रहेको छ ।

यसैगरी एमफील र पीएचडी तर्फ ११३ जना विद्यार्थीलाई समेत प्रमाणपत्र तथा सम्मान पत्र प्रदान गरिने छ ।

दीक्षान्त समारोहमा ५६ वटा स्टलहरू राखिएको छ । त्यही स्टलहरूबाट विद्यार्थीलाई प्रमाणपत्र वितरण गरिनेछ ।