काठमाडौं – नागरिक उन्मुक्ति पार्टीले राष्ट्रियसभा निर्वाचनमा गठबन्धनबाट आफ्नो भाग खोजेको छ । उसले निर्वाचनमा एक सीटका लागि दाबी गरेको बताइएको छ ।

नागरिक उन्मुक्ति पार्टीका संरक्षक रेशमलाल चौधरी र अध्यक्ष तथा भूमि व्यवस्थामन्त्री रञ्जिता चौधरीले आज प्रधानमन्त्रीलाई भेटेर राष्ट्रियसभा निर्वाचनमा गठबन्धनको सीट बाँडफाँटबारे चासो राखेका थिए ।

राष्ट्रियसभाका १९ सीटका लागि माघ ११ गते निर्वाचन हुँदैछ । निर्वाचनमा गठबन्धनभित्रका नेपाली कांग्रेस, माओवादी, नेकपा एस र जसपाले मात्र भागबन्डा गर्ने तयारी गरिरहेको छन् ।

गठबन्धनका चार दलले मात्र राष्ट्रियसभा निर्वाचनमा भागबन्डा गर्न खोजेपछि नागरिक उन्मुक्ति पार्टीले आफूलाई एक सिटको माग गरेको छ ।

आफ्नो पार्टीका सुदूरपश्चिममा १४, लुम्बिनीमा ४ र मधेशमा १ मत रहेको नागरिक उन्मुक्ति पार्टीले बताएको छ ।

उसको सुदूरपश्चिममा ७ प्रदेशसभा सदस्य र ७ जना स्थानीय तहका प्रमुख उपप्रमुख छन् । त्यस्तै लुम्बिनी प्रदेशसभामा ४ र मधेशमा एक जना सांसद छन् ।