काठमाडौं – एनसेल आजियाटा प्रालि (एनसेल)को शेयर लगत अद्यावधिक गर्ने प्रक्रिया उद्योग विभागले अगाडि बढाएको छ । झण्डै एक वर्षदेखि रोकिएको एनसेलको शेयर लगत अद्यावधिक गर्ने प्रक्रिया विभागले अगाडि बढाएको हो ।

मलेसियन कम्पनी आजियाटा ग्रुप बहार्डले ट्याक्स हेभन मुलुक सेन्ट किट्स एन्ड नेभिसमा अवस्थित रेनोल्ड होल्डिङ्समा रहेको आफ्नो स्वामित्वको एनसेलको सम्पूर्ण शेयर गत डिसेम्बर १ मा बिक्री गरेको घोषणा गरेको थियो । जुन शेयर आजिायाटाले सिंगापुरका नागरिक शतीशलाल आचार्यको कम्पनी स्पेक्ट्रलाइट युके लिमिटेडले खरिद गरेको थियो ।

आजियाटा बहार्डले सात वर्ष अगाडि स्वीडेनको टेलियासोनेरासँग एक खर्ब ४४ अर्ब ७८ करोड २५ लाख रूपैयाँमा खरिद गरेको सोही शेयर अति न्यून मूल्य ६ अर्ब रूपैयाँ र सन् २०२९ सम्मको निश्चित प्रतिशत लाभांश लिनेगरी स्पेक्ट्रलाइटलाई बिक्री गरेको थियो ।

सो कारोबारलाई शंकास्पद रूपमा लिएर सरकारले छानबिन प्रक्रिया सुरु गर्दै यथास्थितिमा खरिदबिक्रीको कारोबारलाई अस्वीकार गर्ने निर्णय गरेको थियो ।

सोही कारण एनसेलको रेनोल्ड होल्डिङ्समा रहेको शेयर खरिदबिक्रीको अद्यावधिक प्रक्रिया अहिलेसम्म अगाडि बढ्न सकेको थिएन । तर, लामो समयदेखि रोकिएको एनसेलको शेयर खरिदबिक्रीको लगत अद्यावधिक गर्ने प्रक्रियालाई विभागले अगाडि बढाउन लागेको हो ।

उद्योग विभागका एक अधिकारीले अहिले शेयर खरिदबिक्री गरेका पक्षहरूबीचको कर चुक्ताको विषयलाई अध्ययन गर्ने काम भइरहेको बताए । उनले कानूनसम्मत रूपमा विभागले गर्ने काम अगाडि बढाइएको बताए ।

‘हामीले अहिले कर चुक्ताको विषयलाई अध्ययन गरिरहेका छौं’, उनले भने, ‘कानूनसम्मत रूपमा अद्यावधिक गर्ने काम गर्छौं ।’ उनले बेलायतको कानूनअनुसार दर्ता भएको कम्पनीले गरेको शेयर कारोबारमा नेपालले गैरकानुनी भन्न नसक्ने तर २० प्रतिशत स्थानीय शेयरको अवस्थालाई अध्ययन गरिने उनले बताए ।

गत फागुन ६ गते मन्त्रिपरिषद्को बैठकले एनसेलको शेयर खरिदबिक्री यथास्थितिमा स्वीकार नगर्ने निर्णय गरेको थियो । साथै, कानूनसम्मत रूपमा एनसेलले स्वीकृति नलिएर शेयर खरिदबिक्री गरेकोले हदैसम्मको कानुनी कारबाही गर्ने निर्णय गरेको थियो ।

तर, सरकारले विभागलाई एनसेलको शेयर खरिदबिक्रीको विषयमा कुनै लिखित निर्देशन नदिएको विभागका अधिकारीले बताएका छन् ।