काठमाडौं – नेपालमा हरर जानराका फिल्म नेपाली मात्र होइन, विदेशी पनि खासै चल्दैनन् । दर्शकको मनोविज्ञान बुझ्ने हो भने नेपाली दर्शकका लागि हरर फिल्म खासै रुचिका फिल्म होइनन् ।

यसअघि रिलिज भएको ऋचा शर्मा अभिनित फिल्म ‘सुनकेसरी’ पनि चलेन । पहिलो फिल्म सफल भयो भने यसको दोस्रो भाग बन्ने चर्चा थियो । तर रिलिजको लामो समयसम्म पनि फिल्मको सिक्वेल बन्ने चर्चा छैन । नायिका ऋचा शर्माले नै यसको दोस्रो सिक्वेल बन्ने घोषणा गरेकी थिइन् ।

यतिबेला रिलिज भएको हरर जानराको फिल्म ‘घर’ ले पनि हलमा खासै दर्शक तान्न सकेको छैन । यो फिल्मको रिलिजअघि राम्रै हाइप भए पनि आक्रामक रुपमा दर्शक तान्न सकेन । भलै फिल्म हेर्न केही दर्शक भने हलसम्म पुगे । केही मल्टिप्लेक्स हलमा यो फिल्म अझै पनि प्रदर्शन भइरहेको छ ।

सुरक्षा पन्त, वेनिषा हमाल र अर्पण थापाको शीर्ष भूमिका रहेको यो फिल्म बक्स अफिसमा फ्लप भइसकेको छ । तर निर्माण टिमले भने करोडको व्यापार गरेको दाबी गर्दै आएको छ ।

सामान्य कथामा निर्माण भएको यो फिल्मले दर्शक तर्साउन पनि सकेन लोभ्याउन पनि सकेन । फिल्म हेरेका दर्शकले यो फिल्मको खुलेर तारिफ गर्न सकेनन् । बरु कलाकारलाई निर्देशकले उल्टो टर्चर दिने गरी फिल्म बनाएको, भूतका रुपमा देखाइएका कति कलाकारले विश्वसनीय अभिनय गर्न नसकेको लगायतका आरोप लाग्यो ।

फिल्मको पार्श्वध्वनि संयोजन पनि दर्शकलाई मन परेन । अर्कातिर फिल्मको स्किृप्ट पनि खासै दमदार बन्न सकेन । जसकारण फिल्मको खासै चर्चा भएन ।

यो फिल्ममा शर्मिला पाण्डेको निर्माण छ भने अर्पण थापाको लेखन तथा निर्देशन रहेको छ ।