काठमाडौं– रणवीर कपुरको मुख्य अभिनय रहेको फिल्म ‘एनिमल’ ले ४ सय करोड भारुको आँकडा पार गरेको छ । प्रदर्शनमा आएको पाँच दिनमा यो फिल्मले घरेलु बजारमा २८० र विदेशमा १२१ करोडको व्यापार गरेको छ ।

सन्दीप भंगाको निर्देशन रहेको यस फिल्मले तीन दिनमा दुई सय करोडको व्यापार गरेर रेकर्ड बनाएको थियो । तेस्रो दिनमा दुई सय करोडमा प्रवेश गर्ने यो दोस्रो हिन्दी सिनेमा हो ।

विदेशी बजारमा राम्रो व्यापार गर्ने नायकका रुपमा परिचित रणवीरको यस फिल्मले सोमबार पनि उत्साहजनक व्यापार गर्‍यो ।

यस फिल्मले सुरुवाती दुई दिनमा अष्ट्रेलियामा दंगलले बनाएको रेकर्ड तोडेको थियो । अष्ट्रेलियामा दुई दिनमा भारु साढे एक करोडको व्यापार गरेको रेकर्ड तोड्न एनिमलले साढे दुई करोडको व्यापार गरेको थियो ।

त्यस्तै, क्यानाडामा पठानले दुई दिनमा सर्वाधिक साढे १ करोड व्यापार गरेको रेकर्ड पनि तोडेको छ । एनिमलले दुई दिनमा क्यानाडामा दुई करोड ७० लाखभन्दा बढीको व्यापार गरेको छ ।

सोमबार विदेशका कार्यालय खुल्ने साताको पहिलो दिन भएकाले यसको व्यापारमा कमी आउने अनुमान गरिएपनि हलमा दर्शकको बाक्लो उपस्थिति रहेको भारतीय मिडियाहरुको दाबी छ । एनिमलले छिटो ५ सय करोड क्लबमा प्रवेश गर्ने फिल्म बन्ने धेरैको आँकलन छ ।

यसअघि सबैभन्दा कम १३ दिनमा शाहरुख खानको जवानले ५०० करोड क्लबमा प्रवेश गरेको थियो । यो फिल्म गत सेप्टेम्बरमा प्रदर्शन भएको हो ।