इस्लामावाद- पाकिस्तानको गिल्गिट बल्टिस्तानमा शिक्षा शुल्क वृद्धिको विरोधमा प्रदर्शनको आयोजना गरिएको छ । विद्यालयमा आधारभूत सुविधा नभएपनि शुल्क बढाएको भन्दै सयौँ विद्यार्थी तथा अभिभावकले प्रदर्शन गरेका हुन् ।

प्रदर्शनकारीले विद्यालयमा खानेपानी, प्रयोगशाला, फर्निचरजस्ता सुविधाको अभाव रहेको जनाएका छन् । कतिपय अवस्थामा विद्यालयमा अध्यापन गराउने विषयगत शिक्षकहरुको पनि आभाव रहेको छ । उनीहरुले कक्षाकोठा नभएका कारण खुला रुपमा अध्ययन गर्नुपर्ने बाध्यता रहेकोसमेत जनाएका छन् ।

भारतीय समाचार संस्था एएनआईका अनुसार सरकारको बेवास्ताका कारण दशकौँदेखि गिल्गिट बाल्टिस्तानका सार्वजनिक विद्यालयहरुको अवस्था दयनीय रहेको छ ।

गम्भीर आर्थिक समस्यासँग जुधिरहेको पाकिस्तानमा हालैका दिनहरुमा विद्यालयहरुले शुल्क बढाएका छन् । काराकोरम विश्वविद्यालयले यसैगरी शुल्क बढाउँदा केही समयअघि विद्यार्थीहरुले प्रदर्शन गरेका थिए ।