काठमाडौं– स्वास्थ्य तथा जनसंख्या राज्यमन्त्री सुरेन्द्र यादवले सम्पूर्ण नेपालीलाई स्वस्थ्य अधिकार प्रदान गर्न ३५ अर्ब थप बजेट आवश्यक रहेको बताएका छन् ।

बिहीबार स्वास्थ्य अनुसन्धान परिषद्को एक कार्यक्रममा स्वास्थ्य राज्यमन्त्री यादवले विपन्न नागरिकको स्वास्थ्य उपचार, निशुल्क आधारभूत स्वास्थ्य सेवा र विमा कार्यक्रमका लागि ३५ अर्व थप बजेट स्वास्थ्यमा आवश्यक रहेको बताएका हुन् ।

कार्यक्रममा मन्त्रालयका सचिव राम प्रसाद थपलियाले स्वास्थ्य क्षेत्रमा छुट्याइएको आधा बजेट खर्च नहुने गरेको बताए । सचिव थपलियाले स्वास्थ्यक्षेत्रमा छुट्याइएको बजेटको ५० प्रतिशत खर्च नै नभएको बताएका हुन् ।

अर्थ मन्त्रालयबाट विनियोजन भएको आधा बजेट खर्च नै नहुने गरेकाले हरेक वर्ष स्वास्थ्य क्षेत्रमा प्रयाप्त बजेट विनियोजन भएको उनको भनाइ छ । ‘स्वास्थ्यका कर्मचारीले स्वास्थ्यमा बजेट कम छ भन्नुहुन्छ । हो स्वास्थ्य क्षेत्रमा बजेट कम नै छ,’ सचिव थपलियाले भने, ‘अर्थ मन्त्रालयमा बजेट कम भयो भनेर गयो भने उहाँहरुले भन्नुहुन्छ, स्वास्थ्यमा ५० प्रतिशत बजेट किन खर्च नै हुँदैन ? छुट्याइएको बजेट नै खर्च नभएकाले स्वास्थ्यमा बजेट कम आएको हो ।’

विश्व स्वास्थ्य संगठनको मापदण्डका अनुसार विकासउत्मुख देशहरुमा स्वास्थ्य क्षेत्रमा १० प्रतिशत बजेट हुनु अनिवार्य हुन्छ । तर सरकारले चालु आर्थिक वर्ष २०७६/७७ का लागि कुल बजेटको ४ दशमलब ४८ प्रतिशत मात्रै बजेट विनियोजन गरिएको छ ।

सचिव थपलियाले विनियोजन भएको बजेट फ्रिज हुने अवस्था आउन नदिन मन्त्रालयको नीति तथा कार्यक्रम अनुसार काम गर्न सम्बन्धित निकायलाई सुझाव समेत दिए ।