टोरन्टो- क्यानाडामा रहँदै आएका खलिस्तानी पृथकतावादी नेता गुरुपतवन्त सिंह पन्नुनले प्यालेस्टाइनी आतंकवादी समूह हमासको समर्थन गरेको भन्दै क्यानाडाका हिन्दू समुदायले चिन्ता व्यक्त गरेका छन् ।

हिन्दू फोरम अफ क्यानाडा (एचएफसी) ले क्यानाडाका सार्वजनिक सुरक्षामन्त्री डोमिनिक लेब्लांकलाई सम्बोधन गर्दै लेखेको पत्रमा पन्नुनले आतंकवादी समूह हमासको सर्मथन गरेको र भारतीय वाणिज्य दूतावासमाथि आक्रमण गर्ने धम्की दिएको भन्दै उनीविरुद्ध तत्काल कारवाही गर्न माग गरिएको छ ।

खलिस्तानी गतिविधिमा सक्रिय रहँदै आएका पन्नुनले क्यानाडासहित जी ७ मा रहेका भारतीय दूतावास बन्द गरिदिने धम्की दिएका थिए ।

यस्ता गतिविधि असह्य रहेको भन्दै फोरमले कुनै किसिमको घृणा फैलाउने र हिंसालाई प्रोत्साहन गर्ने गतिविधि नियन्त्रण गर्न क्यानाडा सरकारसमक्ष आग्रह गरेको छ ।

यसबाहेक पन्नुन र उनको ‘सिख फर जस्टिस’ नामक समूहले क्यानाडामा रहेका हिन्दूहरुको विरुद्धमा अभिव्यक्ति दिने गरेको र यसबाट क्यानाडामा रहेका हिन्दू समुदाय आतंकित भएको फोरमको भनाइ छ ।