काठमाडौँ- राष्ट्रिय प्रजातन्त्र पार्टीका सांसद दीपकबहादुर सिंहले धार्मिक सद्भाव बिथोल्ने काममा आफ्नो पार्टीका कोही व्यक्ति संलग्न भए सम्पूर्ण जिम्मेवारी लिन तयार रहेको बताएका छन् ।

शुक्रबार संसद भवन नयाँ बानेश्वरमा सञ्चारकर्मीसँग कुरा गर्दै सांसद सिंहले मुलुकमा धार्मिक सद्भाव कायम गर्न आफ्नो पार्टी एकमत रहेको भन्दै कहीँ कतै धार्मिक सद्भाव बिथोल्ने काममा राप्रपाका कोही व्यक्ति संलग्न भए सम्पूर्ण जिम्मेवारी लिन तयार रहेको बताएका हुन् ।

उनले धार्मिक सद्भाव बिथोल्ने काममा पूर्वराजा ज्ञानेन्द्र शाहको संलग्नता भए कारवाही गर्नसमेत सरकारलाई चुनौति दिए । धार्मिक सद्भाव बिथोल्ने काममा पूर्वराजा ज्ञानेन्द्र शाहको संलग्न भए आफूले सांसद पदबाटै राजीनामा दिने उनले बताए ।

उनले विभिन्न प्रकरणमा आफ्नो दोष अरुलाई थोपार्न राजवादीहरुलाई आरोप लगाइएको तर्क गरे ।